Íslenskt frjálsíþróttafólk náði góðum árangri erlendis um helgina. HM í frjálsum fór fram, auk þess sem Elísabet Rut Rúnarsdóttir jafnaði vikugamalt Íslandsmet sem Guðrún Karítas Hallgrímsdóttir setti um síðustu helgi.
Íslandsmet, mótsmet og sigur Elísabetar í Bandaríkjunum
Elísabet sigraði í sleggjukasti á UTSA Invitational mótinu í San Antonio í Texas þann 20.–21. mars með kasti upp á 71,41 metra, sem er jöfnun á Íslandsmeti. Elísabet jafnaði þar með Íslandsmet Guðrúnar og sýnir með því frábæra byrjun á keppnistímabilinu.
Elísabet Rut kom inn í mótið með einfalt markmið eftir erfitt tímabil á síðasta ári, þar sem meiðsli höfðu sett strik í reikninginn. Fyrir hana snerist keppnin fyrst og fremst um að komast aftur út í hringinn og njóta þess að vera komin á fullt á ný.
„Markmiðið inn í þessa keppni var bara að njóta þess að vera loksins aftur að kasta eftir frekar erfið meiðsli á síðasta ári.“
Hún segir undirbúninginn hafa gengið vel undanfarna mánuði og að það hafi skipt miklu máli að ná samfelldum æfingum án þess að meiðsli trufluðu áframhaldið. Það hafi gefið henni góðan grunn og aukið sjálfstraust inn í tímabilið.
„Ég er búin að ná að halda mér meiðslalausri, sem er alltaf mikill bónus, og æfingar hafa gengið vel.“
Elísabet nefnir einnig að það hafi verið hvetjandi að sjá Guðrúnu í góðu formi, enda getur sterk samkeppni og góður árangur annarra ýtt undir áframhaldandi framfarir.
Fram undan er sumartímabilið, þar sem hún stefnir að því að halda áfram á sömu braut og kasta vel. Evrópumótið er þar skýrt markmið.
„Markmiðið fyrir tímabilið er að halda áfram að kasta vel, og svo stefni ég á EM í sumar.“
Henni líkar vel við í Bandaríkjunum, þar sem hún segir umgjörðina í kringum íþróttirnar og námið vera sterka og hjálpa sér að ná því besta fram. Hún bætir einnig við að hún muni halda áfram og taka meistaranám í sálfræði.
„Lífið í USA er geggjað, það er ótrúlega vel haldið utan um bæði æfingar og skólann, sem skiptir miklu máli til að ganga vel.“
Elísa Kristinsdóttir með brautarmetssigur á Chianti Ultra Trail
Elísa Kristinsdóttir átti stórkostlega helgi á Chianti Ultra Trail á Ítalíu, þar sem hún sigraði kvennaflokk í 75 km hlaupi með 3100 metra hækkun á tímanum 6:22:31.
Sigurinn var afar afgerandi, en Elísa kom í mark rúmum níu mínútum á undan næsta keppanda. Þá bætti hún jafnframt brautarmetið um 40 mínútur, sem undirstrikar enn frekar hversu öflug frammistaða hennar var.
Elísa hafnaði í 18. sæti í heildina, var fyrst kvenna í mark og sigraði sinn aldursflokk einnig örugglega.
Erlend úrslit
Á UTSA Invitational mótinu í San Antonio í Texas, sama móti og Elísabet vart á, keppti Embla Margrét Hreimsdóttir í 1500 metra hlaupi og hljóp á 4:45,23 mín., sem er hennar besti árangur á tímabilinu.
Í Houston í Texas 19. mars sigraði Marsibil Þóra Í. Hafsteinsdóttir í hástökki með stökki upp á 1,65 metra.
Á Alan Connie Shamrock Invitational í Myrtle Beach í Suður-Karólínu 19.–21. mars hafnaði Sigursteinn Ásgeirsson í 3. sæti í kúluvarpi með kast upp á 16,43 metra, sem er hans besti árangur á tímabilinu.
Á sama móti keppti Elísabet Ósk Jónsdóttir í tveimur greinum. Hún hljóp 100 metra á 12,92 sek. og 400 metra grindahlaup á 1:08,08 mín., sem er besti árangur hennar á tímabilinu í báðum greinum.
Í sjöþraut á sama móti setti María Helga Högnadóttir persónulegt met þegar hún safnaði 4992 stigum. María átti einnig nokkra mjög sterka einstaka árangra innan þrautarinnar, þar á meðal persónuleg met í 100 metra grindahlaupi, 200 metra hlaupi og 800 metra hlaupi. Sara Kristín Lýðsdóttir lauk keppni með 4155 stig, sem er hennar besti árangur á tímabilinu, og setti meðal annars persónulegt met í 800 metra hlaupi.
Í Randers í Danmörku 21. mars keppti Viktor Orri Fríðuson á VDMU Hold mótinu. Hann jafnaði sitt persónulega met í 60 metra hlaupi þegar hann hljóp á 7,69 sek. og setti síðan persónulegt met í 200 metra hlaupi með 24,30 sek.
Á Heimsmeistaramótinu innanhúss í Toruń í Póllandi átti Ísland einnig þrjá keppendur um helgina. Nánar er fjallað um frammistöðu þeirra í frétt hér
Næst á dagskrá
Á laugardaginn, 28. mars, fer fram þriðja hlaup í Hlaupaseríu Hlaupahóps FH og Hlaupárs í Hafnarfirði. Þá er einnig fram undan Evrópumeistaramótið innanhúss í mastersflokkum í Toruń í Póllandi, sem stendur yfir dagana 27. mars til 2. apríl.
Sendið inn efni
Eigið þið myndir, úrslit eða fréttir sem eiga heima í vikuyfirlitinu? Sendið á kormakur@fri.is