Það er heldur betur allt að fara í gang í frjálsíþróttunum eftir aðeins rólegri vikur undanfarið.
Innanhússtímabilið hafið
Eins og vanalega hóf unga frjálsíþróttafólkið innanhússkeppnistímabilið á Silfurleikum ÍR, en þeir fóru fram núna í lok nóvember. Silfurleikarnir eru haldnir til heiðurs Vilhjálmi Einarssyni þrístökkvara og silfurverðlaunum hans frá Ólympíuleikunum í Melbourne árið 1956. Í ár var það sonur Vilhjálms, Unnar Vilhjálmsson, sem var heiðursgestur mótsins.
Þátttakendur sýndu heldur betur að æfingar haustsins eru að skila sér en það voru hvorki fleiri né færri en 520 persónulegar bætingar á mótinu, sem er alveg frábært. Það verður gaman að fylgjast með þessu unga frjálsíþróttafólki núna á keppnistímabilinu.
Annar fastur liður fyrir jól er Aðventumót Ármanns en það fór fram núna um helgina, 13.-14. desember, og þar létu bætingar keppenda heldur ekki á sér standa og þar voru bætingarnar í heildina 247.
Flottur árangur erlendis
Okkar helsta frjálsíþróttafólk er einnig farið að keppa aftur á erlendri grundu og átti Hilmar Örn Jónsson, sleggjukastari, alveg frábært mót sl. mánudag, 8. desember, þegar hann kastaði sleggjunni 76,70 m á móti í Svíþjóð. Þetta er annað lengsta kast Hilmars frá upphafi, og annað lengsta kast íslensks karlmanns, og er aðeins 40 cm frá Íslandsmeti hans í greininni.
Seinni afreksúthlutun og launasjóður íþróttafólks
Sl. mánaðamót var úthlutað í seinna skiptið í ár úr Afrekssjóði FRÍ. Að þessu sinni var 7,5 milljónum úthlutað til 23 einstaklinga í fjórum flokkum. Heildarúthlutun ársins nemur því 22 milljónum.
Þann 1. desember var launasjóður íþróttafólks kynntur og í fyrsta sinn í sögu íslenskra íþrótta mun afreksíþróttafólk fá greidd laun fyrir vinnu sína sem íþróttamenn. Það voru sex úr frjálsíþróttum sem hlutu laun úr launasjóðnum að þessu sinni.
Hvað er svo framundan í desember?
Síðustu tvær vikur ársins eru fastir liðir eins og vanalega á dagskrá, bæði vallarfrjálsar, götuhlaup sem og uppskeruhátíð FRÍ.
- Uppskeruhátíð FRÍ fer fram nk. föstudagskvöld kl. 18 í sal 3-4 í Laugardalshöllinni. Þar verður veittur fjöldi viðurkenninga til einstaklinga og hópa sem hafa skarað fram úr, sýnt framúrskarandi árangur eða verið með ómetanlegt framlag til íþróttarinnar. Það má búast við skemmtilegri kvöldstund þar sem farið verður yfir frjálsíþróttaárið og hvetjum við öll til að mæta og fagna með okkar frábæra íþróttafólki.
- Áramót Selfoss fer fram í Lindexhöllinni á Selfossi laugardaginn 27. desember.
- Áramót Fjölnis fer fram í Laugardalshöllinni mánudaginn 29. desember. Í gegnum árin hafa mörg hafið innanhússtímabilið á Áramóti Fjölnis, verður gaman að sjá hvernig það verður í ár.
- Svo er það hið stórskemmtilega Gamlárshlaup ÍR sem fer fram á gamlársdag, 31. desember. Um er að ræða 10 km FRÍ vottað götuhlaup sem hefur í gegnum tíðina verið mjög vinsæl leið fyrir hlaupara og aðra að enda árið og hafa hópar keppst við að mæta í sem skemmtilegustu búningum sem setur öðruvísi svip á hlaupið en önnur götuhlaup.
Frjálsíþróttirnar á Íslandi eru komnar á fulla ferð á nýjan leik eftir frábært sumar og haust og við öll orðin ansi spennt fyrir komandi tímabili.