Það má heldur betur segja að júní mánuður verði pakkaður af allskyns frjálsíþróttaviðburðum, hvort sem um er að ræða vallarfrjálsar eða götuhlaup.
Í kvöld, 5. júní, fer Vormót ÍR fram á ÍR vellinum í Breiðholti.
Helgina 7. og 8. júní fara fram Mattamót 5 og Mattamót 6 í Laugardalshöllinni.
Hafnarfjarðarhlaupið, sem er FRÍ vottað götuhlaup, fer fram fimmtudagskvöldið 12. júní. Þar verður boðið upp á 5 km og 10 km hlaup.
Um miðjan júní, helgina 14.-15. júní, er komið að fyrsta Meistaramóti sumarsins þegar Meistaramót Íslands 11-14 ára fer fram á ÍR vellinum í Breiðholti.
Sömu helgi, 14.-15. júní, fer einnig fram Norðurlandameistaramótið í fjölþrautum í Gautaborg í Svíþjóð. Að þessu sinni taka fjórir íslenskir keppendur þátt á mótinu.
Fimmtudagskvöldið 19. júní er komið að Miðnæturhlaupi Suzuki, sem er FRÍ vottað götuhlaup þar sem boðið er upp á 5 km, 10 km og 21,1 km hlaup.
Helgina 20.-22. júní fer Meistaramót Íslands 15-22 ára fram á ÍR vellinum í Breiðholti.
Dagana 24.-25. júní er komið að Evrópubikar og að þessu sinni fer hann fram í Maribor í Slóveníu. Nánari frétt um Evrópubikar og íslenska landsliðið sem tekur þátt kemur þegar nær dregur mótinu.
Þriðjudaginn 24. júní fara Héraðsleikar HSK fram á Selfossvelli, en þeir eru fyrir keppendur 10 ára og yngri sem eru félagar í félögum innan HSK.
Dagana 24.-25. júní fer Aldursflokkamót HSK fram á Selfossvelli, en það er fyrir keppendur 11-14 ára sem eru félagar í félögum innan HSK.