Íslenska frjálsíþróttafólkið átti frábæran dag á vellinum á þriðjudaginn, sjá nánar um það hér. Þá er bara að sjá hvernig annar keppnisdagurinn fer, en frjálsíþróttakeppni Smáþjóðaleikanna heldur áfram í dag á Estadi Comunal í Andorra la Vella.
Dagskrá dagsins í dag er skemmtileg og má búast við góðum degi á vellinum í frábæru veðri. Athugið að allar tímasetningar eru á staðartíma (tveimur tímum á undan Íslandi).
Ingibjörg Sigurðardóttir verður fyrst út á braut þar sem hún er meðal keppenda í 400 m grindahlaupi kvenna sem hefst kl. 18:00. Besti tími Ingibjargar er 59,48 sek frá því um miðjan júlí sl. en hún var í svaka bætingagír síðasta sumar þannig að það verður gaman að fylgjast með henni í sumar.
Næsta grein er svo 400 m grindahlaup karla og þar mætir Ívar Kristinn Jasonarson til keppni en hlaupið hefst kl. 18:20. Ívar er margreyndur í keppni á Smáþjóðaleikunum en hann fór á sína fyrstu leika 2011. Besti tími Ívars í 400 m grindahlaupi er 51,43 frá því sumarið 2023.
Næst er komið að langstökki karla og þar eigum við tvo keppendur líkt og í langstökki kvenna á þriðjudaginn, þá Þorleif Einar Leifsson og Guðjón Dunbar D. Þorsteinsson. Besti árangur Þorleifs er 7,09 m innanhúss frá því í febrúar 2023, utanhúss hefur hann lengst stokkið 6,53 m. Guðjón hefur lengst stokkið 6,91 m (utanhúss) og gerði hann það sumarið 2024.
Eir Chang Hlésdóttir mætir svo fersk á brautina kl. 18:40 þegar undanriðlarnir í 200 m hlaup kvenna fara fram. Eir átti frábært innanhússtímabil þar sem hún m.a. bætti Íslandsmetið í 200 m hlaupi þegar hún hljóp á 23,69 sek. Utanhúss hefur hún hraðast hlaupið á 24,30 sek, en hún gerði það í fyrrasumar.
Tvíeykið frá því í 100 m hlaupinu á þriðjudaginn mætir aftur á svæðið í undanriðlum 200 m hlaups karla sem fara fram kl. 19:00, það eru þeir Kolbeinn Höður Gunnarsson og Kristófer Þorgrímsson. Kolbeinn hefur hraðast hlaupið 200 m á 20,91 sek en hann gerði það í lok maí 2023 og besti tími Kristófers er 21,29 sek frá því í ágúst sl.
Erna Sóley Gunnarsdóttir mætir í kúluvarpshringinn þegar keppni kúluvarpi kvenna hefst kl. 19:15. Þrátt fyrir mikla stórmótareynslu þá eru þetta fyrstu Smáþjóðaleikarnir hennar og var hún annar fánaberi íslenska hópsins á setningarhátíðinni á mánudaginn. Erna á Íslandsmetið í kúluvarpi sem er 17,91 m, en hún setti það sl. sumar.
Næst mætir á brautina reynsluboltinn og frjálsíþróttakempan Íris Anna Skúladóttir þar sem hún tekur þátt í 1500 m hlaupi kvenna sem fer fram kl. 19:25. Skemmtilegt að Íris Anna sé aftur mætt á hlaupabrautina hérna í Andorra sléttum 20 árum eftir að hún keppti fyrir Íslands hönd á Smáþjóðaleikunum í Andorra 2005, þar sem hún hljóp 1500 m á 4:45,28 mín. Hennar besti tími er frá árinu 2005, 4:32,89 mín.
Næst er komið að Daða Arnarsyni að hlaupa 1500 m, en 1500 m hlaup karla fer fram 19:35. Besti tími Daða er 3:58,91 mín (innanhúss) frá því fyrr á árinu.
Hástökk kvenna hefst kl. 19:30 og þar er Birta María Haraldsdóttir meðal keppenda en hún hefur hæst stokkið 1,87 m og gerði hún það í maí í fyrra.
Guðbjörg Jóna Bjarnadóttir endar svo kvöldið þegar hún hleypur úrlsitahlaupið í 400 m hlaupi kvenna sem hefst kl. 20:20, en hún hljóp á persónulegu meti í undanriðlunum á mánudaginn þegar hún kom í mark á 55,20 sek.
Við hvetjum öll til að senda okkar fólki hlýja og góða strauma fyrir komandi keppni og endilega fylgjast með á live stream frá keppninni.
Þau segja að live úrslit eigi að birtast hér, en það þarf að taka því með fyrirvara, virkaði ekki sem skyldi á þriðjudaginn.
Frjálsíþróttakeppni leikanna heldur svo áfram á laugardaginn. Hérna má sjá tímaseðil og startlista fyrir hvern og einn dag.