Þá er keppnistímabilið heldur betur byrjað og það hefur verið nóg um að vera undanfarnar vikur hjá íslensku frjálsíþróttafólki víðs vegar um heiminn.
Smáþjóðaleikarnir í Andorra
Íslenska frjálsíþróttafólkið stóð sig vel á Smáþjóðaleikunum sem fóru fram í Andorra dagana 26.-31. maí. Þau komu heim samtals með 18 verðlaun, fjögur gull, sjö silfur og sjö brons, sett var eitt mótsmet, eitt Íslandsmet og sex persónulegar bætingar. Sjá má nánar frá keppnisdögunum þremur hér, hér og hér.
Myndir frá Smáþjóðaleikunum eru komnar inn á Flickr síðu FRÍ.
Þrjár frjálsíþróttakonur komnar inn á NCAA í Bandaríkjunum
Nú styttist í lokakeppni NCCA í Bandaríkjunum sem fer fram dagana 11.-14. júní nk., en NCAA er meðal stærstu og virtustu háskólaíþróttakeppna í heiminum. Það eru þrjár íslenskar frjálsíþróttakonur sem þegar eru komnar inn á mótið með flottum árangri í undankeppni mótsins.
Arndís Diljá Óskarsdóttir átti frábæran dag þegar hún kastaði spjótinu 54,99 m og bætti sig þar með um rétt rúma þrjá metra, en hún átti best 51,97 m frá því í byrjun apríl sl. Arndís Diljá á þriðja besta kast íslenskrar konu í spjótkasti frá upphafi en nálgast óðfluga annað lengsta kastið sem er 55,54 m. Arndís á mjög góðri siglingu í spjótkastinu.
Eva María Baldursdóttir var líka með persónulega bætingu í hástökki þegar hún stökk 1,82 m á, en hún átti best 1,81 m frá því í ágúst 2020. Þetta er þriðji besti árangur íslenskrar konu í hástökki frá upphafi, en þær eru þrjár sem hafa stokkið hæst 1,82 m.
Þriðja konan sem komin er inn á NCAA er sleggjukastarinn Guðrún Karítas Hallgrímsdóttir en hún kastaði 69,92 m, sem er persónuleg bæting um 16 cm og 70 m múrinn rétt handan við hornið.
Aldursflokkamet hjá Benedikt Gunnari
Kúluvarparinn ungi, Benedikt Gunnar Jónsson, bætti enn eitt aldursflokkametið í kúluvarpi í síðustu viku þegar hann kastaði 5 kg kúlunni 18,20 m og bætti þar með metið í flokki 16-17 ára pilta um 34 cm.
Hvað er framundan?
Í dag, 3. júní, fer Vormót Fjölnis fram á ÍR vellinum, en það er fyrir krakka á aldrinum 11-15 ára.
Á fimmtudaginn, 5. júní, er komið að Vormóti ÍR en það fer fram á ÍR vellinum.
Helgina 7.-8. júní fara fram Mattamót 5 og Mattamót 6 í Laugardalshöllinni.
Þess má geta að síðasti dagur til að sýna árangur fyrir valið á landsliðinu sem keppir á Evrópubikar, sem fram fer í Maribor í Slóveníu dagana 24.-25. júní, er sunnudagurinn 8. júní nk.