Arndís Diljá með EM U23 lágmark
Arndís Diljá Óskarsdóttir (FH) var nú ekki lengi að kasta aftur yfir 50 m, en hún rauf 50 m múrinn undir lok mars sl. Eins og kom fram í þeirri frétt þá er 50 m kast lágmarkið inn á EM U23 sem fram fer í Bergen í Noregi 17.-20 júlí nk., en því miður var mótið þá ekki Global Calendar mót og því ekki um lágmark að ræða. En núna um síðastliðna helgi þá keppti hún á Pepsi Florida Relays í Bandaríkjunum, sem er Global Calendar mót, og kastaði þar 51,97 m og náði þar með lágmarkinu inn á EM U23, og bætti sinn persónulega árangur í leiðinni og er núna í þriðja sæti yfir lengsta kast íslenskrar konu frá upphafi. Frábær árangur hjá Arndísi Diljá og hún greinilega í hörku formi.
Arndís er þar með sú fimmta sem nær lágmarki inn á EM U23, sjá nánar um mótið, lágmörk og þau sem náð hafa lágmarki hér.
Júlía Kristín með enn eina bætinguna í grindahlaupi
Eins og kom fram um daginn þá er Júlía Kristín Jóhannesdóttir (Breiðablik) búin að vera á góðri siglingu í grindahlaupi í vetur þar sem hún margbætti árangur sinn og aldursflokkamet í 60 m grindahlaupi. Utanhússtímabilið fer mjög vel af stað hjá henni og í lok mars bætti hún sig í 100 m grindahlaupi og náði lágmarki inn á EM U23 þegar hún hljóp á 13,74 sek. Hún gerði sér svo lítið fyrir um síðustu helgi og bætti sig um 12 sekúndubrot þegar hún hljóp á 13,62 sek á Tom Tellez Alumni Inv. í Bandaríkjunum. Verður spennandi að fylgjast með Júlíu Kristínu í sumar miðað við þessa byrjun á tímabilinu.
Flottur árangur á innanfélagsmóti FH
FH var með innanhússmót um síðustu helgi þar sem flottur árangur náðist í nokkrum greinum. Þar var m.a. keppt í 1000 m hlaupi karla og þar sigraði Fjölnir Brynjarsson (FH) á tímanum 2:28,66 mín og bætti sig um tæpar 4 sek, og er þessi árangur hans sá þriðji besti frá upphafi innanhúss. Virkilega góður árangur hjá honum Fjölni.
Einnig var keppt í 1500 m hlaupi kvenna og þar sigraði Íris Anna Skúladóttir (FH) á 4:37,48 mín, og það sem er athyglisvert við þennan árangur er að þetta er besti tími hennar frá því í byrjun árs 2006, þegar hún var á sautjánda ári en þá hljóp hún á 4:30,89 mín. Frábær árangur hjá þessari frábæru íþróttakonu.
Sjá heildarúrslit mótsins hér.
Hvað er framundan?
Um komandi helgi, 12. og 13. apríl, fer Evrópumeistaramótið í götuhlaupum fram í fyrsta skipti og fer það fram í Brussel og Leuven í Belgíu. Þar er keppt í 10 km, hálfu maraþoni og maraþoni og mun Ísland eiga keppendur í öllum vegalengdum bæði í karla-og kvennaflokki. Sjá nánar um mótið og íslensku keppendurna hér.
Laugardaginn 12. apríl fer Stökkmót Smára fram í Íþróttahúsinu í Varmahlíð.