Um næstu helgi, dagana 12.-13. apríl, fer Evrópumeistaramótið í götuhlaupum fram í Brussel og Leuven í Belgíu í allra fyrsta sinn, og er keppt í 10 km, hálfu maraþoni og maraþoni. Það sem gerir hlaupið extra spennandi og sérstakt er að hlaupið er einnig opið almenningi. Þannig að þarna verða bestu hlauparar Evrópu mættir á götur Brussel og Leuven ásamt áhugahlaupurum alls staðar frá og er markmiðið að það verði 30.000 manns sem taka þátt. Það má því vænta þess að það verði virkilega mikil og góð stemming á svæðinu.
Íslendingar munu að sjálfsögðu senda flott lið til leiks í allar vegalegndir og af báðum kynjum, fjóra karla og þrjár konur.
Karlar
Kristján Svanur Eymundsson (Fjölnir) tekur þátt í maraþoninu en hann á best 2:29,35 klst, en hann hljóp á þeim tíma í Valencia maraþoninu í desember 2023. Þetta er áttundi besti tími íslensk karlmanns í maraþoni frá upphafi.
Í maraþoni karla eru 43 hlauparar frá 23 löndum skráðir til leiks (í Evrópumeistaramótinu sjálfu).
Maraþonið er ræst kl. 10:15 (að staðartíma) á sunnudaginn, 13. apríl.
Arnar Pétursson (Breiðablik) hleypur hálft maraþon um helgina en hann á best 01:06,12 klst frá því í mars 2020. Þetta er þriðji besti tími íslensks karlmanns í hálfu maraþoni frá upphafi.
Í hálfu maraþoni karla eru skráðir 56 hlauparar frá 28 löndum (í Evrópumeistaramótinu sjálfu).
Hálfa maraþonið er ræst kl. 10:00 (að staðartíma) á laugardaginn, 12. apríl.
Stefán Kári Smárason (FH) keppir í 10 km hlaupinu, en þar á hann best 33:16,00 mín frá því í Miðnæturhlaupi ÍBR í júní 2024 sem er 32. besti tíminn frá upphafi. Hlynur Andrésson (ÍR) keppir einnig í 10 km hlaupinu og hann á best 29:17,00 mín frá því í febrúar 2024, en það er annar besti tími íslensks karlmanns frá upphafi.
Í 10 km hlaupi karla eru skráðir til leiks 80 hlauparar frá 32 löndum (í Evrópumeistaramótinu sjálfu).
10 km hlaupið er ræst kl. 9:30 (að staðartíma) á sunnudaginn, 13. apríl.
Konur
Elín Edda Sigurðardóttir (ÍR) hleypur maraþon um helgina og á hún best 02:44,48 klst frá því í október 2019 og er það þriðji besti tími íslenskrar konu frá upphafi.
Í maraþoni kvenna eru 27 hlauparar frá 16 löndum skráðir til leiks (í Evrópumeistaramótinu sjálfu).
Maraþonið er ræst kl. 10:15 (að staðartíma) á sunnudaginn, 13. apríl.
Sigþóra Brynja Kristjánsdóttir (UFA) keppir í hálfu maraþoni og hennar besti tími er 01:17,49 klst frá því í september 2024 og er það þriðji besti tími íslenskrar konu frá upphafi.
Í hálfu maraþoni kvenna eru 45 hlauparar frá 24 löndum skráðir til leiks (í Evrópumeistaramótinu sjálfu).
Hálfa maraþonið er ræst kl. 10:00 (að staðartíma) á laugardaginn, 12. apríl.
Andrea Kolbeinsdóttir (ÍR) keppir í 10 km hlaupinu og á hún þar best 34:33,00 mín frá því í desember síðastliðnum og er það annar besti tími íslenskrar konu frá upphafi.
Í 10 km hlaupi kvenna eru 89 hlauparar frá 36 löndum skráðir til leiks (í Evrópumeistaramótinu sjálfu).
10 km hlaupið er ræst kl. 9:30 (að staðartíma) á sunnudaginn, 13. apríl.
Heimasíðu hlaupsins má sjá hér.