Það er aldrei lognmolla í frjálsíþróttunum og var síðastliðin vika engin undantekning þar á.
Arndís Diljá rýfur 50 m múrinn
Spjótkastarinn Arndís Diljá Óskarsdóttir (FH) var með frábæra opnun á sínu tímabili og gerði sér lítið fyrir og rauf 50 m múrinn á Hurricane Invitational í Flórída um helgina, þar sem hún kastaði 51,07 m og sigraði spjótkastskeppnina. Virkilega góð bæting hjá henni Arndísi en hennar besti árangur var 49,28 m frá því í ágúst sl.
Þetta kast Arndísar, 51,07 m, er fjórða lengsta kast íslenskrar konu í spjótkasti. Frábær árangur hjá Arndísi Diljá og verður gaman að sjá hvað hún gerir í sumar.
Þessi árangur er yfir lágmarkinu á Evrópumeistaramót U23 sem fram fer í Bergen í Noregi í sumar en þar sem mótið var ekki Global Calendar mót þá telst árangurinn ekki sem lágmark. En það er nægur tími framundan fyrir Arndísi að kasta 50 m á Global Calendar móti.
Úrslit mótsins má sjá hér.
Ari Freyr Gautason með aldursflokkamet í 3000 m hlaupi
Ari Freyr Gautason (UMSB) er ungur frjálsíþróttamaður sem býr í Svíþjóð og æfir þar og keppir í frjálsíþróttum. Hann keppti í 3000 m hlaupi um daginn og kom í mark á tímanum 9:59,64 mín og er það aldursflokkaet í flokki 13 ára pilta.
Fyrir þau sem hafa gaman af ættfræði og fjölskyldutengslum þá er Ari Freyr sonur Gauta Jóhannessonar sem var landsliðsmaður í millivegalengdarlaupum í upphafi aldarinnar. Tímar Gauta í 1500 m hlaupi og 3000 m hlaupi eru meðal 10 bestu tíma Íslendinga í greinunum.
HM í masters hafið í Flórída
Eins og greint var frá í síðustu viku þá fer heimsmeistaramótið í masters flokkum fram dagana 23.-30. mars og eru tveir íslenskir keppendur sem taka þátt í ár, Hafsteinn Óskarsson (ÍR) og Fríða Rún Þórðardóttir (ÍR).
Fríða Rún hóf keppni í gær, sunnudaginn 23. mars, á 8 km víðavangshlaupi og sigraði sinn flokk (55-59 ára) nokkuð örugglega þegar hún kom í mark á tímanum 33:51,45 og endaði í 15. sæti í heildina af 80 keppendum. Frábært hjá henni Fríðu og fyrstu verðlaunin strax komin í hús.
Svo kepptu þau bæði í undanriðlum 800 m hlaupsins í gær og komumst bæði áfram í úrslitin sem hlaupin verða seinna í dag. Hafsteinn fer í úrslitin með besta tímann í sínum flokki (65-69 ára), en hann hljóp undanriðlana á 2:33,71 mín. Fríða er með sjöunda besta tímann inn í úrslitin í sínum flokki en hún hljóp undanriðlana á 2:49.36mín. Verður gaman að sjá hvað þau gera seinna í dag.
Hasfsteinn keppir svo í undanriðlum í 1500 m hlaupi föstudaginn 28. mars kl. 16:30 (á staðartíma) og úrslitin eru svo dagin eftir, laugardaginn 29. mars kl. 18:06 (á staðartíma). Fríða hleypur svo 3000 m hlaup miðvikudaginn 26. mars kl. 15:20 (á staðartíma) og í undanriðlum 1500 m hlaupsins á föstudeginum 28. mars kl. 15:30 (á staðartíma) og eru úrslit 1500 m hlaupsins svo á laugardaginn 29. mars kl. 16:36.
Nóg framundan á HM í masters flokkum og hægt að fylgjast með gangi mála hér.
Hvað er framundan?
Bónusmót FH fer fram laugardaginn 29. mars í frjálsíþróttahöllinni í Kaplakrika. Um er að ræða mót fyrir 13 ára og yngri og hefst keppni kl. 8:30.
Laugardaginn 29. mars fer einnig fram Akureyrarmót UFA og Kjarnafæðis Norðlenska og verður það í Boganum á Akureyri. Mótið er öllum opið, boðið er upp á þrautabraut fyrir 9 ára og yngri og keppt í greinum í flokkum 10 ára og ypp í karla-og kvennaflokk. Húsið opnar kl. 10.