Þá er bara kominn apríl og ýmislegt framundan, bæði innan vallar og á götum og stígum borgarinnar, sem og innanhúss og utanhúss og innanlands og erlendis.
Helgina 12.-13. apríl fer Evrópumeistarmótið í götuhlaupum fram í Brussel og Leuven í Belgíu. Þetta er í fyrsta sinn sem þetta mót fer fram og teflir Ísland fram sjö manna liði í ár og er keppt í 10 km, hálfu maraþoni og maraþoni. Nánari frétt um mótið og íslensku keppendurnar kemur þegar nær líður mótinu.
Laugardaginn 12. apríl fer Stökkmót Smára fram í íþróttahúsinu í Varmahlíð og er þar keppt í ýmsum stökkgreinum og kúluvarpi, í karla-og kvennaflokki.
Á sumardaginn fyrsta, fimmtudaginn 24. apríl, er komið að hinu árlega og sögufræga götuhlaupi, Víðavangshlaupi ÍR. Um er að ræða 5 km hlaup um miðborg Reykjavíkur og einnig er boðið upp á 2,5 km skemmtiskokk. Víðavangshlaup ÍR í ár er auk þess Meistaramót Íslands í 5 km götuhlaupi.
Laugardaginn 26. apríl fer Vormaraþon Félags maraþonhlaupara fram í Reykjavík. Keppt er í hálfu maraþoni og maraþoni og er hlaupið um fallegt umhverfi á helstu stígum Reykjavíkurborgar. Um er að ræða FRÍ vottað hlaup.
Í lok apríl, dagana 28.-29. apríl, fer Reykjavíkurmeistaramót 11-14 ára fram í Laugardalshöllinni.