Hlynur Andrésson setti um helgina nýtt Íslandsmet í hálfmaraþoni þegar hann hljóp á 1:02:30. Með því bætti hann eigið met.
Undirbúningur Hlyns fyrir hlaupið gekk mjög vel. Hann dvaldi í mánuð í Portúgal með hópi hlaupara og æfði þar fyrir komandi verkefni. Að hans sögn gekk allt eftir áætlun og hvorki veikindi né meiðsli settu strik í reikninginn.
„Undirbúningurinn hefur gengið eins vel og ég gat vonast eftir. Ég var í mánuð með hópi af hlaupurum úti í Portúgal að undirbúa fyrir þessar keppnir og gat þar æft mjög vel. Engin veikindi eða meiðsli, allt hefur gengið eftir áætlun,“ segir Hlynur.
Hlynur vissi að formið væri gott og að möguleiki væri á sterku hlaupi. Hann bendir þó á að margt þurfi að falla með í langhlaupum, eins og veður og samkeppni á keppnisdegi.
Hann fór hraðar af stað en hann hafði upphaflega ætlað sér. Ástæðan var sú að hann ákvað að fylgja hraða fyrir 61:45 tíma. Hann fór í gegnum 5 km á 14:42 og 10 km á 29:26. Það eru afar sterkir millitímar. Hann hélt síðan vel út allan seinni hluta hlaupsins.
„Við hlupum í gegnum 5 km á 14:42 og 10 km á 29:26, sem er töluvert hraðara en ég hef hlaupið í gegn áður í hálfmaraþoni. Ég vissi að aðal áskorunin var að þrauka út seinni helminginn og missa ekki of mikið niður hraðann. Ég er mjög ánægður með hversu sterkur ég var alla leið að endamarkinu.“
Árangurinn er enn eitt skrefið í sterkri byrjun á árinu hjá Hlyni. Þann 8. febrúar hljóp hann einnig 10 km götuhlaup á 28:57, sem var persónuleg bæting.
Stefnan sett á Íslandsmet í maraþoni og EM í Birmingam
„Stefnan er nú sett á Hannover maraþonið 12. apríl. Þar ætla ég að reyna að slá Íslandsmetið mitt í maraþoni og vonandi komast nógu hátt á Evrópulistann til þess að öðlast þátttökurétt á Evrópumeistaramótinu í frjálsum í Birmingham í ágúst.“