Íslenska landsliðið í utanvegahlaupum er komið til Kamnik í Slóveníu, þar sem European Athletics Off-Road Running Championships fer fram dagana 5.–7. júní.
Mótið er Evrópumeistaramót í fjalla- og utanvegahlaupum og er nú haldið í þriðja sinn, eftir mót í El Paso á La Palma árið 2022 og Annecy í Frakklandi árið 2024. Alls verða tíu keppnir á dagskrá í senior- og U20-flokkum, en íslenska liðið tekur þátt í 52 km trail-hlaupinu laugardaginn 6. júní.
Mótið í ár er það stærsta til þessa, en 593 keppendur frá 33 þjóðum eru skráðir til leiks. Meðal keppenda eru nokkur af stærstu nöfnum greinarinnar, þar á meðal sænska afrekskonan Tove Alexandersson, svissneska fjallahlaupakonan Maude Mathys og ítalski reynsluboltinn Cesare Maestri.
Brautin hentar íslenska liðinu vel
Íslenski hópurinn hefur verið síðustu daga í Slóveníu við undirbúning og brautarskoðanir. Ferðalagið til Kamnik tók um þrjár klukkustundir og kom liðið sér fyrir á glænýju hóteli í nágrenni keppnissvæðisins
Síðustu tveir dagar hafa farið í að skoða brautina og undirbúa keppnina. Stígarnir eru frábærir, landslagið hrikalega flott og aðstæður virðast geta hentað íslensku hlaupurunum vel. Mesta klifrið kemur snemma í hlaupinu en eftir það lítur leiðin út fyrir að vera tiltölulega hröð. Brautin minnir að mörgu leyti á Laugaveginn, en með meiri heildarhækkun.
Trail-hlaupið er 52 km langt og er hlaupið á hringleið sem hefst og endar í Kamnik. Heildarhækkun og lækkun er 2450 metrar og því ljóst að um krefjandi verkefni er að ræða, þar sem úthald, styrkur, tæknileg færni og skynsamleg keppnisáætlun skipta miklu máli.
Íslenska liðið
Ísland sendir fullt lið í bæði karla- og kvennaflokki, en í liðakeppni telja samanlagðir tímar þriggja bestu hlaupara hverrar þjóðar.
Karlar
- Þorsteinn Roy Jóhannsson, UMFÖ
- Þorbergur Ingi Jónsson, UFA
- Sigurjón Ernir Sturluson, FH
- Stefán Pálsson, Ármann
Konur
- Andrea Kolbeinsdóttir, ÍR
- Elísa Kristinsdóttir, UFA
- Íris Anna Skúladóttir, FH
- Anna Berglind Pálmadóttir, UFA
Fararstjóri liðsins er Friðleifur Friðleifsson, formaður Langhlaupanefndar FRÍ.
Ræst kl. 07:00 að íslenskum tíma
Íslensku keppendurnir ræsa allir á sama tíma í trail-hlaupinu laugardaginn 6. júní, kl. 09:00 að staðartíma í Slóveníu, sem er kl. 07:00 að íslenskum tíma.
Streymt verður beint frá mótinu á YouTube-rás European Athletics og hvetjum við áhugafólk um hlaup til að fylgjast með íslenska liðinu í þessu sterka verkefni.
Sjá myndir hér að neðan af byrjun ferðar hjá íslenska hópnum
Hér má sjá leiðina
