Þvílík meistaramótshelgi að baki. Meistaramót Íslands í frjálsíþróttum fór fram um liðna helgi á Selfossi og Meistaramót Íslands í maraþoni fór fram sl. laugardag samhliða Reykjavíkurmaraþoni Íslandsbanka.
Meistaramót Íslands á Selfossi
Meistaramót Íslands fór fram um helgina á Selfossi og var um að ræða þriggja daga frjálsíþróttaveislu þar sem allt okkar besta frjálsíþróttafólk mætti til leiks.
Mótið hófst heldur betur með trompi strax á föstudagskvöldinu þegar Guðrún Karítas Hallgrímsdóttir gerði sér lítið fyrir og bætti Íslandsmetið í sleggjukasti þegar hún kastaði 71,38 m í fjórðu umferð. Hún bætti þar með Íslandsmet Elísabetar Rutar Rúnarsdóttur frá 2024 sem var 70,47 m. Sjötta og síðasta kast Guðrúnar Karítasar var einnig yfir gamla Íslandsmetinu en þá kastaði hún 70,86 m. Frábær árangur hjá Guðrúnu Karítas sem var þarna að kasta í fyrsta sinn yfir 70 m en sl. miðvikudag, 20. ágúst, bætti hún árangur sinn þegar hún kastaði 69,99 m á móti í Ungverjalandi. Guðrún Karítas er heldur betur að enda sumarið með trompi. Þessi árangur hennar setur hana í mjög góða stöðu á „Road to Tokyo“ fyrir HM í frjálsum en á morgun mun liggja ljóst fyrir hvort hún sé á leiðinni þangað.
Laugardagurinn var ekki síðri en þá gerði hinn 16 ára gamli Tobías Þórarinn Matharel sér lítið fyrir og vann langstökkskeppnina þegar hann stökk 7,00 m og náði í leiðinni EM U18 lágmarki. Tobías rauf í fyrsta sinn 7 metra múrinn en hans fyrri besti árangur var 6,81 m frá því í lok júlí sl. Eins má geta þess að þessi árangur er fjórði besti árangur íslensks pilts í flokki 16-17 ára frá upphafi hér á landi. Virkilega flottur árangur hjá þessum unga íþróttamanni.
Það voru svo ÍR-ingar sem unnu stigakeppni félagsliða og það með þónokkrum yfirburðum en þau hlutu 83,5 stig, tæpum 30 stigum meira en lið FH sem var í öðru sæti. ÍR-ingar unnu stigakeppnina bæði í kvenna- og karlaflokki. Til hamingju með frábæran árangur, ÍR-ingar.
Fjölskyldan sameinast í frjálsum – frjálsíþróttir eru sannarlega fjölskyldusport
Það þarf að nefna þann skemmtilega atburð sem átti sér stað á MÍ um helgina þegar þar kepptu móðir og börnin hennar þrjú, og öll náðu þau lágmörkum í sínum keppnisgreinum. Fjölskyldan sem um ræðir er Auður Aðalbjarnardóttir sem keppti í kúluvarpi og börnin hennar þrjú; Grétar Björn Unnsteinsson sem keppti í stangarstökki, Unnur Birna Unnsteinsdóttir sem keppti í 100 m grindahlaupi og kringlukasti og Eva Unnsteinsdóttir sem keppti í 400 m grindahlaupi. Auður var öflugur kastari hérna áður fyrr og á m.a. 14. besta árangur íslenskrar konu í spjótkasti frá upphafi, 43,95 m, og 12. besta árangur íslenskrar konu í kúluvarpi, 13,22. Svo er pabbinn í fjölskyldunni, Unnsteinn Grétarsson, einnig mjög öflugur frjálsíþróttamaður en hann var einn besti 400 m grindarhlaupari landsins á sínum tíma og 8. besta tíma íslensks karlmanns í greininni frá upphafi, 52,40 sek. Þannig að börnin þeirra eiga nú ekki langt að sækja frjálsíþróttaáhugann- og hæfileikana.
En þetta sýnir svo sannarlega að það er hægt að iðka og næ flottum árangri í frjálsíþróttum á öllum aldri og að frjálsar eru hið fínasta fjölskyldusport.
Meistaramót Íslands í maraþoni
Meistaramót Íslands í maraþoni fór fram á laugardaginn samhliða Reykjavíkurmaraþoni Íslandsbanka. Þar urðu þau Hlynur Andrésson og Halldóra Huld Ingvarsdóttir Íslandsmeistarar. Hlynur kom í mark á 2:26,51 klst og Halldóra Huld kom í mark á 3:13,17 klst. Við óskum þeim innilega til hamingju með Íslandsmeistaratitilinn.
Hérna má sjá viðtal við Hlyn eftir hlaupið.
Hérna má sjá viðtal við Halldóru Huld eftir hlaupið.