Þá er frjálsíþróttastarfið farið af stað með glæsibrag þetta haustið og spennandi frjálsíþróttavetur framundan. Æfingar farnar af stað og fastir liðir eins og venjulega voru á dagskrá núna í haustbyrjun og nóg um að vera framundan.
BRONSLEIKAR ÍR
Bronsleikar ÍR fóru fram í frjálsíþróttahöllinni í Laugardalnum laugardaginn 5. október og var fyrsta frjálsíþróttamótið sem haldið var þar eftir að salurinn þar var tekinn í gegn núna í sumar. Þar öttu kappi okkar yngstu iðkendur og það var ekki annað að sjá en að mótið hafi heppnast ofsalega vel og mikið fjör í höllinni. Keppendur í ár voru um 300 og keppt var í þrautabraut og fjölþraut barna í aldursflokkum 6-11 ára.
Þetta voru fimmtándu Bronsleikarnir frá því að mótið var haldið í fyrsta sinn haustið 2010, en mótið er ávallt haldið til heiðurs ÍR-ingnum Völu Flosadóttur og bronsverðlaununum sem hún vann í stangarstökki á Ólympíuleikunum í Sydney árið 2000.
Heiðursgestur mótsins að þessu sinni var annar Ólympíufari ÍR kúluvarparinn Erna Sóley Gunnarsdóttir, sem keppti á Ólympíuleikunum í París í sumar. Hún afhent ungum og upprennandi frjálsíþróttakempum verðlaun sín fyrir þátttökuna í Bronsleikunum og hvatti þau til dáða. Ekki amalegt fyrir okkar yngstu iðkendur að hafa svona flotta fyrirmynd í frjálsum íþróttum og fá að líta hana augum.
VÍÐAVANGSHLAUPIN FARIN AF STAÐ
Víðavangshlauparöð Fætur toga og Framfara, hollvinafélags millivegalengda-og langhlaupara, fór af stað núna í lok september og hafa tvö hlaup þegar farið fram. Þann 28. september var hlaupið við Kjarrhólma í Kópavogi og 5. október var hlaupið í Fossvoginum. Úrslit hlaupanna er hægt að sjá hér. Þriðja og síðasta hlaupið í þessar hlauparöð verður svo 12. október nk. Sjá nánar um hlauparöðina hér.
Einnig hafa verið hlaupin víðavangshlaup á Akureyri undanfarna laugardaga, en það er mótaröð á vegum Fjallahlaupaþjálfunar. En hlaupið var í Kjarnaskógi laugardagana 28. september og 5. október.
Ekki leiðinlegt að taka þátt í skemmtilegum víðavangshlaupum þessu fallega haustveðri sem hefur verið á landinu að undanförnu.
Meistaramót í Víðvangshlaupi Íslands fer svo fram í Laugardalnum 19. október – um að gera að spreyta sig í framangreindum mótaröðum og taka svo þátt í meistaramótinu. Skráning í Meistaramótið fer fram hér.
VINNUSTOFA MEÐ EVRÓPSKA FRJÁLSÍÞRÓTTASAMBANDINU
Dagana 26.-28. september sátu fulltrúar FRÍ mjög áhugaverða vinnustofu með fulltrúum frá Evrópska Frjálsíþróttasambandinu. Vinnustofan er hluti af þróunarverkefni sambandsins þar sem unnið er með frjálsíþróttasamböndum einstaka landa og þau aðstoðuð við framþróun undir skammstöfuninni NDP (e. National Development Program). Tilgangur vinnustofunnar var þannig að fara í ítarlega greiningarvinnu á stöðu FRÍ í víðum skilningi og leita tækifæra til framþróunar. Sem hluti af vinnustofunni var lagður grunnur að ítarlegri stefnumótunarvinnu sem FRÍ mun halda áfram að vinna að næstu vikur og mánuði. Við hjá FRÍ erum sannfærð um að framtíðin sé í frjálsum íþróttum og var það virkilega áhugavert og hollt að fara í svona ítarlega vinnu við að greina þau tækifæri sem við höfum til að gera íþróttina okkar ennþá stærri og öflugri, hvort heldur er varðandi útbreiðslu og fjöldaþátttöku eða árangur afreksíþróttafólksins okkar.
HVAÐ ER FRAMUNDAN?
Það er nóg af viðburðum framundan núna í október. Næsta laugardag 12. október fer fram þriðja víðavangshlaupið í hlauparöð Fætur toga og Framfara. Um að gera að reima á sig hlaupaskóna og taka þátt í skemmtilegu hlaupi úti í náttúrunni. Skráning fer fram hér.
Sama dag, 12. október nk, fara einnig Krakkaleikarnir fram í Lindexhöllinni á Selfossi. Krakkaleikarnir eru partur af Kid‘s Athletics degi Alþjóðafrjálsíþróttasambandsins en sá dagur snýst um að fagna því að börn og unglingar um allan heim taki þátt í íþróttum, séu virk og skemmti sér. Stefnt er að því að nýta krafta frjálsíþróttanna til að hvetja börn og unglinga um allan heim til að hreyfa sig, vera virk, þróa færni sína og sjálfstraust og tengjast íþróttum og hreyfingu fyrir lífstíð. Krakkaleikarnir á Selfossi í ár eru fyrir hressa og káta krakka á aldrinum 8-11 ára og taka þau þátt í 6 skemmtilegum og fjölbreyttum frjálsíþróttaþrautum. Sjá nánar um Krakkaleikana hér, ekkert þátttökugjald er og skráning fer fram hér.
Svo ber að nefna að í lok mánaðar, laugardaginn 26. október, fer Meistaramót Íslands í maraþoni fram í Elliðaárdalnum. Meistaramótið í maraþoni er haldið sem hluti af Haustmaraþoni Félags maraþonhlaupara og eru því allir íslenskir ríkisborgarar sem skráðir eru til leiks undir merki aðildarfélags gjaldgengir til íslandsmeistaratitils. Samhliða meistaramótinu verður boðið upp á Fjölskylduhlaup TM sem er ætlað yngri hlaupurum sem eru að stíga sín fyrstu skref í hlaupunum. Sjá nánar um þessa viðburði hér.
Eins og sjá má á þessari upptalningu fer haustið kröftuglega af stað með fjölda viðburða innan vallar sem utan.