Það má heldur betur búast við lífi og fjöri í frjálsíþróttahöllinni í Laugardal um helgina þegar þar fara fram tvö meistaramót. Annars vegar Meistaramót Íslands í fjölþrautum og hins vegar Meistaramót Íslands í eldri aldursflokkum.
Meistaramót Íslands í fjölþrautum
Keppnisgreinar á MÍ í fjölþraut eru samkvæmt reglugerð FRÍ í flokkum 15 ára, 16-17 ára, 18-19 ára og 20 ára og eldri beggja kynja. Keppt er í fimmtarþraut í flokkum pilta og stúlkna 15 ára, stúlkna 16-17 ára, 18-19 ára og kvenna. Keppt er í sjöþraut í flokkum pilta 16-17 ára, 18-19 ára og karla.
Það eru 28 keppendur skráðir til leiks frá 10 félögum og eru keppendur skráðir til leiks í öllum flokkum nema í sjöþraut 18-19 ára pilta.
Nokkrir fyrrum Íslandsmeistarar eru skráðir til leiks og þar má t.d. nefna fjölþrautakonu ársins 2024, Ísold Sævarsdóttur (FH) en hún varð Íslandsmeistari í þraut, í sínum flokki, bæði inni og úti í fyrra sem og Norðurlandameistari útí í sumar. Ísold er að færast upp um flokk í ár og keppir nú í flokki 18-19 ára stúlkna. Auk Ísoldar eru m.a. skráð til leiks um helgina þau Ísak Óli Traustason (UMSS) og Fjóla Signý Hannesdóttir (SELFOSS), en þau eru bæði reynslumikið þrautarfólk.
Sjá nánari upplýsingar um keppendur og tímaseðil hér.
Meistaramót Íslands í eldri aldursflokkum
Frábær skráning er á MÍ í eldri aldursflokkum en það eru 82 keppendur frá 16 félögum skráðir til leiks á mótið. Keppendur eru á öllum aldri, sá yngsti 31 árs og sá elsti 84 ára. Eldri iðkendur ársins 2024, Fríða Rún Þórðardóttir (ÍR) og Hafsteinn Óskarsson (ÍR) munu bæði taka þátt á mótinu, ásamt ýmsum fleiri kempum.
Það verður gaman að fylgjast með okkar fólki í höllinni um helgina, hvort sem það eru unglingar að keppa í þraut eða mastersliðið okkar í hinum ýmsu greinum.
Sjá nánari upplýsingar um keppendur og tímaseðil hér.