Þann 30. apríl næstkomandi klukkan 18:00 á 3. hæð í ÍSÍ heldur Íþróttamannanefnd ÍSÍ kosningafund þar sem ný Íþróttamannanefnd verður kosin fyrir tímabilið 2025-2027. Hlutverk nefndarinnar er að vera málsvari íþróttamanna í samskiptum við ÍSÍ. Íþróttamannanefnd fær einn fulltrúa í stjórn ÍSÍ sem getur komið fram skoðunum íþróttafólks í hinum ýmsu málefnum. Íþróttamannanefndin hefur einnig komið mikið inn í starf afreksstjóra ÍSÍ undanfarin tvö ár.
Þá er enn opið fyrir framboð og hvetjum við þau sem áhuga hafa og uppfylla þær kröfur sem settar eru, til að bjóða sig fram í þessa mikilvægu nefnd.
Þau sem bjóða sig fram þurfa:
- Að hafa náð 18 ára aldri.
- Hafa ekki fallið á lyfjaprófi.
- Iðka íþróttagrein innan ÍSÍ.
- Hafa keppt á hæsta stigi í fullorðinsflokki á Ólympíuleikum, heimsmeistaramóti, Evrópumeistaramóti eða undankeppnum þeirra, eða sambærilegum mótum fyrir sitt sérsamband á síðastliðnum átta árum.
Kosið er til tveggja ára og tilkynna skal framboð með því að senda tölvupóst á imn@isi.is.