Í gærkvöldi voru Smáþjóðaleikarnir í Andorra settir á fallegri setningarathöfn á íþróttaleikvangi í Andorra la Vella, höfuðborg smáríkisins. Þetta er í tuttugasta skipti sem Smáþjóðaleikarnir eru haldnir, en þeir voru fyrst haldnir fyrir 40 árum, árið 1985, í San Marino. Þetta er í þriðja sinn sem Smáþjóðaleikarnir eru haldnir í Andorra, en þeir voru haldnir þar árin 1991 og 2005.
Það er gaman frá því að segja að það eru þrír keppendur frá þessum tveimur Smáþjóðaleikum sem eru með í ferðinni í ár. Guðkmundur Karlsson, framkvæmdarstjóri FRÍ og fararstjóri hópsins í ár, keppti í sleggjukasti á leikunum 1991 og gerði sér lítið fyrir og sigraði þá keppni. Svo voru þau Íris Anna Skúladóttir og Óðinn Björn Þorsteinsson meðal keppendar á leikunum 2005. Óðinn Björn keppti þar í kúluvarpi og sigraði greinina, en hann er einn af þjálfurum íslenska hópsins í ár. Íris Anna keppti í 5000 m hlaupi á leikunum 2005, þá aðeins 15 ára gömul, og sigraði hlaupið og svo er hún núna, 20 árum seinna, í keppendahópnum okkar og mun í ár keppa í 1500 m hlaupi og 5000 m hlaupi.
Í ár samanstendur frjálsíþróttaliðið á Smáþjóðaleikunum af 20 frábæru íþróttafólki, 10 konum og 10 körlum, sum með mikla landsliðsreynslu og önnur minni, sum búin að keppa á fjölda Smáþjóðaleika og önnur á sínum fyrstu leikum.
Hópurinn kom til Andorra á sunnudagskvöldið og var gærdagurinn nýttur í að skoða völlin og taka létta æfingu og það er ekki annað að sjá og heyra en að keppendur séu vel stemmdir og það er góð stemming í hópnum. Látum fylgja nokkar myndir af æfingu gærdagsins.
Frjálsíþróttakeppni leikanna fer fram í dag, þriðjudag, á fimmtudaginn og á laugardaginn. Hérna má sjá tímaseðil og startlista fyrir hvern og einn dag.
Dagskrá dagsins í dag er ekki af verri endanum og má búast við skemmtilegum degi á vellinum í alveg brakandi blíðu. Athugið að allar tímasetningar eru á staðartíma (tveimur tímum á undan Íslandi).
Guðbjörg Jóna Bjarnadóttir verður fyrst á brautina þegar undanriðlar í 400 m hlaupi kvenna fara fram kl. 17:30. Besti tími Guðbjargar í 400 m hlaupi utanhúss er 55,21 sek frá því í ágúst 2024.
Stangarstökk kvenna hefst svo klukka 17:35 og þar mun Karen Sif Ársælsdóttir vera á meðal keppenda en hún er búin að stökkva hæst 3,80 m innanhúss og gerði hún það í febrúar sl. Utanhúss á hún best 3,71 m frá því síðastliðið sumar.
Næstur á hlaupabrautina verður svo Sæmundur Ólafsson en hann mun taka þátt í 400 m hlaupi karla, og fara undariðlarnir fram kl. 17:45. Sæmundur á best 48,63 sek frá því í júní 2023.
Þær Eir Chang Hlésdóttir og María Helga Högnadóttir taka þátt í undanriðlum 100 m hlaups kvenna sem fram fara kl. 18:10. Besti tími Eirar í 100 m hlaupi er 12,23 sek frá því í ágúst í fyrra og besti tími Maríu Helgu er 12,04 frá í maí í fyrra. Úrslitin í 100 m hlaupi kvenna fara fram kl. 20:50.
Undanriðlar í 100 m hlaupi karla fara fram klukkan 18:25 og þar taka þátt þeir Kolbeinn Höður Gunnarsson og Kristófer Þorgrímsson. Kolbeinn á best 10,51 sek frá því í júní 2023 og besti tími Kristófers er 10,58 sek frá því í lok júní í fyrra. Úrslitin í 100 m hlaupi karla fara fram kl. 21:00.
Þær Birna Kristín Kristjánsdóttir og Ísold Sævarsdóttir taka þátt í langstökki kvenna sem hefst klukkan 18:40. Birna Kristín hefur stokkið lengst 6,46 m og gerði hún það í júní í fyrra og lengsta stökk Ísoldar er 6,01 m frá því í febrúar sl.
Fjölnir Brynjarsson tekur þátt í 800 m hlaupi karla sem er klukkan 18:55 en hann á best utanhúss 1:54,26 mín frá því í maí í fyrra.
Síðasta tæknigrein dagsins er svo spjótkast kvenna og þar ætlar Ísold Sævarsdóttir að taka þátt en hún hefur kastað lengst, með 600 g spjótinu, 38,75 m og gerði hún það á Vormóti HSK fyrr í mánuðinum.
Síðasta grein kvöldsins er svo 4×400 m boðhlaup blandaðra sveita sem fram fer klukkan 21:15 og íslensku sveitina skipa Ívar Kristinn Jasonarson, Ingibjörg Sigurðardóttir, Sæmundur Ólafsson og Eir Chang Hlésdóttir.
Við hvetjum öll til að senda okkar fólki hlýja og góða strauma fyrir komandi keppni og endilega fylgjast með á live stream frá keppninni.