Erna Sóley Gunnarsdóttir (ÍR) kom til Parísar dag. Hún keppir í undanúrslitum í kúluvarpi fimmtudaginn 8. ágúst kl. 8:25 að íslenskum tíma. Úrslitin í kúluvarpi verða föstudaginn 9. ágúst kl. 17:37 að íslenskum tíma.
Erna Sóley er tólfta íslenska frjálsíþróttakonan sem keppir í á Ólympíuleikunum og sú fyrsta til að keppa í kúluvarpi. Hér er hægt að sjá Íslendinga á Ólympíuleikunum frá upphafi hér. Árið 2024 hefur verið gott keppnisár hjá Ernu Sóleyju:
- Fyrsta sæti með 16,85 á Reykjavík International Games í febrúar.
- Áttunda sæti með 16,74 m. á Evrópubikarmeistaramóti í Kastgreinum í Portúgal í mars.
- Annað sæti með 17,20 m. á Norðurlandameistaramótinu í Svíþjóð í maí.
- Tuttugasta sæti með 16,26 m. á Evrópumeistaramótinu í Róm í júní.
- Annað sæti með 17,23 m. á Smáþjóðameistaramótinu á Gíbraltar í júní.
- Fyrsta sæti með 17,91 m. á Meistaramóti Íslands á Akureyri í júní. Hún bætti eigið Íslandsmet í kúluvarpi utanhúss sem er aðeins sentimetra frá Íslandsmeti hennar innanhúss.
- Annað sæti með 17,50 m. á Meeting Voor Mon í Belgíu í júlí.
“Ég fer út í dag, 3. ágúst og keppi síðan 8. Ágúst. Markmiðið hjá mér er að ná bætingu og komast í úrslit. Ég held ég hafi keppt við lang flestar af þessum stelpum alveg nokkrum sinnum en kannski ein eða tvær sem ég hef aldrei keppt við. Ég er spenntust fyrir því að keppa og fá að upplifa Ólympíuandann í keppni. Ég er mjög spennt að sjá Ólympíuþorpið. Það eru engin önnur mót sem maður er umkringdur svona mikið af mismunandi íþróttafólki alls staðar af í heiminum. Ég er kannski minnst spennt fyrir pappakassa rúminu í Ólympíuþorpinu haha og nei ég hef aldrei komið til Parísar eða Frakklands áður,” sagði Erna.
Sýnt er frá Ólympíuleikunum á RÚV og hægt er að fylgjast með úrslitum í rauntíma hér.