Aukakrónuhlaup Ármanns fer fram í kvöld, miðvikudaginn 8. júlí, og verður ræst fyrir utan höfuðstöðvar Landsbankans við Reykjastræti 6 í Reykjavík.
Hlaupið hefur í gegnum árin verið þekkt fyrir flata og hraða braut og er 10 km hlaupið jafnframt Íslandsmót í 10 km götuhlaupi. Keppt verður í tveimur vegalengdum; 5 km hlaupi sem verður ræst kl. 19:00 og 10 km hlaupi sem verður ræst kl. 20:00.
Enn er hægt að skrá sig til leiks og fer skráning fram á fullu verði á hlaupdegi. Skráningargjald er 5.000 kr. í 5 km og 5.500 kr. í 10 km.
Afhending keppnisnúmera fer fram í höfuðstöðvum Landsbankans, Reykjastræti 6, frá kl. 16:00 á hlaupdegi og þar til hálftími er í ræsingu. Gengið er inn um aðalinngang.
Báðar hlaupaleiðir eru löglega mældar og vottaðar af FRÍ. Ræst verður við höfuðstöðvar Landsbankans og hlaupið um miðborgina og meðfram Sæbrautinni, þar sem leiðirnar bjóða upp á góðar aðstæður fyrir hrað hlaup.
Peningaverðlaun í formi Aukakróna verða veitt fyrir efstu sæti karla og kvenna í 10 km hlaupi auk verðlauna í 5 km hlaupi. Þá verða einnig vegleg útdráttarverðlaun frá samstarfsaðilum Aukakróna Landsbankans.
Í 10 km hlaupinu verður keppt til verðlauna í aldursflokkum beggja kynja samkvæmt reglugerð FRÍ um götuhlaup.
Hlauparar eru hvattir til að nýta almenningssamgöngur eða aðra virka ferðamáta. Aðstaða verður fyrir hlaupara í anddyri Landsbankans þar sem hægt verður að geyma fatnað og komast á salerni.
Skráning er enn opin, tryggðu þér sæti á ráslínu í kvöld!