Keppnishelgin var góð og skemmtileg. Stórmót ÍR fór fram í Reykjavík 7.–8. febrúar með mikilli þátttöku í bæði yngri og fullorðinsflokkum. Samhliða því var íslenskt frjálsíþróttafólk að keppa erlendis. Hér er uppgjör vikunnar og það helsta sem stóð upp úr, bæði heima og úti.
Stórmót ÍR
Stórmót ÍR fór fram um helgina og það var mikil þátttaka ungra keppenda úr fjölmörgum félögum en samtals voru 623 skráðir til keppni frá 22 félögum, þar af 276 konur og 347 karlar, þar sem yngsti keppandi var 4 ára og sá elsti 66 ára. Það voru fjölmargar bætingar og flottur árangur hjá öllum keppendum og við óskum öllum til hamingju með árangurinn sinn um helgina.
Úrslit mótsins er hægt að finna hér
Úrslit erlendis
Hilmar Örn Jónsson kastaði 74,38 m í sleggjukasti á DSA Elit í Falun, Svíþjóð
Aníta Hinriksdóttir hljóp á 2:04.12 í 800 m á IFAM indoor í Louvain-la-Neuve, Belgíu
Helga Þóra Sigurjónsdóttir stökk 1,82 m í hástökki á High Jump Meeting Hustopečské skákání, Tékklandi. Vert er að nefna að Helga Þóra er fyrsti Íslendingurinn til að keppa á silfurmóti í frjálsum íþróttum. Mótið er eingöngu hástökksmót og mæta oft bestu hástökkvarar heims á það. Helga Þóra á best 1,83 m svo hún byrjar árið sterkt.
Eva María Baldursdóttir stökk 1,80 m í hástökki í Penn Classic í Fíladelfíu um helgina. Eva María sem keppir fyrir háskólann í Pittsburgh sigraði glæsilega, setti mótsmet og jafnaði sinn besta árangur innanhúss en hún hefur hæst stokkið 1,84 m utanhúss. Hún átti síðan mjög góðar tilraunir við næstu hæð sem var 1,84 m. Þetta er annar sigurinn í röð hjá Evu Maríu á þessu innanhússtímabili en hún vann Penn State National Open í lok janúar með 1,79 m stökki. Næst keppir Eva María eftir 2 vikur á ACC championships og freistar þess að bæta sig á því móti og ná árangri til að komast inn á lokamótið innanhúss. 16 bestu hástökkvarar úr öllum háskólum Bandaríkjanna komast inn á lokamótið.
Hlynur Andrésson hljóp á 28:57 í 10 km á Groet uit Schoorl í Hollandi. Hlynur hleypur undir 30 mínútum í 11. árið í röð og er það ótrúlega flottur árangur. Aðeins tveir aðrir Íslendingar í sögunni hafa farið undir 30 mínútur og Hlynur er annar á árinu til að fara undir 29 mínútur en Baldvin Þór Magnússon hljóp á 27:40 fyrr á árinu. Það verður spennandi að fylgjast með þeim í ár og greinilegt að við erum með sterka keppni í langhlaupunum.
Hvað er framundan?
Næstu helgi fer fram Meistaramót Íslands í fjölþrautum ásamt Meistaramóti Íslands í eldri aldursflokkum. Það verður gaman að fylgjast með hverjir standa uppi sem sigurvegarar. Skráning er hafin í Roster.
Sendið inn efni
Eigið þið myndir, úrslit eða fréttir sem eiga heima í vikuyfirlitinu? Sendið á kormakur@fri.is