Meistaramót Íslands 15-22 ára fór fram um helgina í Laugardalshöllinni. Flottur árangur náðist á mótinu, en þetta var fyrsta mót tímabilsins hjá mörgum frjálsíþróttaiðkendum.
Hæst ber að nefna frábæran árangur Christinu Ölbu Marcus Hafliðadóttur (Fjölnir) í 60 m hlaupi. Hún kom í mark í úrslitahlaupinu á 7,44 sek sem er bæting um 16 sekúndubrot. En ekki nóg með það heldur er þetta einnig nýtt aldursflokkamet í greininni í flokki 18-19 ára stúlkna. Eldra met var 7,47 sek en það áttu þær Guðbjörg Jóna Bjarnadóttir og Tiana Ósk Whitworth. Auk alls þessa þá er þessi tími Christinu, 7,44 sek, annar hraðasti tími íslenskrar konu í 60 m hlaupi frá upphafi. Aðeins Íslandsmetið hennar Guðbjargar Jónu er hraðara, 7,35 sek. Virkilega glæsilegur árangur hjá henni Christinu og verður gaman að fylgjast með henni á brautinni á næstunni.
Eitt mótsmet var einnig sett um helgina en það setti kúluvarparinn Benedikt Gunnar Jónsson (ÍR) þegar hann varpaði 5 kg kúlunni í flokki pilta 16-17 ára, 17,67 m. Flottur árangur hjá þessum unga og frábæra kúluvarpara.
Auk þessa þá voru sett fjölmörg persónuleg met og þar má meðal annars nefna árangur Guðjóns Dunbar Diaquoi Þorsteinssonar (Fjölnir) í þrístökki, en hann stökk 14,70 m og bætti sig um tæpa 20 cm og jafnaði með þessum árangri fimmta lengsta þrístökk íslensks karlmanns innanhúss.
Flottur árangur á fyrsta meistaramóti ársins og verður gaman að fylgjast með þessu flotta íþróttafólki á næstunni.
Heildarúrslit mótsins má sjá hér.