58. Bikarkeppni FRÍ fer fram á Sauðárkróki um helgina

Einn af hápunktum utanhússtímabilsins hérna innanlands verður um helgina þegar 58. Bikarkeppni FRÍ fer fram á Sauðárkróki. Um er að ræða tveggja daga mót þar sem keppt er samtals í 27 greinum í karla- og kvennaflokki. Eins og í öðrum bikarkeppnum í frjálsum, hvort sem það er Bikarkeppni FRÍ eða Evrópubikar, þá er um liðakeppni að ræða sem er ekkert svo algengt í frjálsíþróttum en alltaf mjög gaman. Það getur myndast mjög skemmtileg stemming hjá liðum og liðsandinn blómstrar.

Í ár taka átta lið þátt í bikarkeppninni.

Flest af okkar besta og efnilegasta frjálsíþróttafólki mætir til leiks um helgina og má þar nefna langflest þau sem tóku þátt í Evrópubikar um síðustu helgi. Þar ber kannski helst að nefna þau sem settu þau Íslandsmet sem féllu á Evrópubikar.

• Andrea Kolbeinsdóttir (ÍR) bætti Íslandsmetið í 3000 m hindrunarhlaupi á Evrópubikarnum en um helgina keppir hún í 1500 m hlaupi, sem er nú nokkuð styttri vegalengd en hún er vön að hlaupa. Besti tími Andreu í 1500 m hlaupi er 4:35,12 mín frá því sumarið 2013. Embla Margrét Hreimsdóttir (FH) er einnig meðal keppenda í 1500 m hlaupi kvenna, en hún er einmitt landsliðsmanneskja í greininni og hennar besti tími er 04:31,46 mín frá því í mars sl. 1500 m hlaup kvenna er á dagskrá klukkan 15:45 á laugardaginn, 5. júlí.
• Eir Chang Hlésdóttir (ÍR) bætti Íslandsmetið í 200 m hlaupi á Evrópubikar, en um helgina keppir hún í 100 m hlaupi. Hún stórbætti sinn besta árangur í þeirri grein á Evrópubikar þegar hún hljóp á 11,69 sek. María Helga Högnadóttir (FH), landsliðskona í spretthlaupum, er einnig skráð til leiks í 100 m hlaupinu en hennar besti tími er 12,04 sek. 100 m hlaup kvenna er á dagskrá klukkan 14:10 á sunndaginn, 6. júlí.
• Irma Gunnarsdóttir (FH) bætti Íslandsmetið í þrístökki á Evrópubikar og um helgina keppir hún í þrístökki og langstökki. Vikugamalt Íslandsmet hennar í þrístökki er 13,72 m og hennar besti árangur í langstökki er 6,45 m frá því fyrr á þessu ári. Meðal annarra keppenda í þrístökki kvenna er Anna Metta Óskarsdóttir (HSK/SELFOSS) sem bætti aldursflokkametið í þrístökki innanhúss í flokki 15 ára stúlkna fyrr á þessu ári, en Anna Metta stóð sig frábærlega á MÍ 15-22 ára fyrir tæpum tveimur vikum þar sem hún varð sexfaldur Íslandsmeistari í flokki 15 ára stúlkna. Þrístökk kvenna er á dagskrá kl. 14:00 á sunnudaginn, 6. júlí. Langstökk kvenna er á dagskrá kl. 15:30 á laugardaginn, 5. júlí.

Auk ofangreindra er fjöldi frábærra keppenda skráðir til leiks um helgina, það má búast við mjög skemmtilegri bikarkeppni á Sauðárkróki.

Tímaseðil og keppendalista má sjá hér.

Úrslit munu birtast hér.

Okkar unga frjálsíþróttafólk mætir einnig á Sauðárkrók um helgina því bikarkeppni 15 ára og yngri fer þar fram á sunnudaginn, 5. júlí.

Í ár eru það níu lið sem keppa í bikarkeppni 15 ára og yngri.

Tímaseðil og keppendalista má sjá hér.

Úrslit munu birtast hér.