Einn af hápunktum innanhússtímabilsins í frjálsum íþróttum fer fram núna um helgina þegar Meistaramót Íslands innanhúss 2026 verður haldið í Laugardalshöllinni dagana 28. febrúar – 1. mars. Flest af okkar besta frjálsíþróttafólki mætir til leiks og keppir um Íslandsmeistaratitla í sínum greinum.
Það má búast við skemmtilegu móti og spennandi keppni í mörgum greinum. Sérstaklega er ánægjulegt að Guðni Valur Guðnason, Guðbjörg Jóna Bjarnadóttir og Aníta Hinriksdóttir, Íslandsmethafar, mæta til landsins til að keppa, sem styrkir mótið enn frekar og verður gaman að fylgjast með þeim. Irma Gunnarsdóttir og Erna Sóley Gunnarsdóttir sem einnig eiga Íslandsmet í sínum greinum mæta, og eru þær búnar að vera nálægt sínu besta í ár.
Hér eru nokkur atriði sem vekja sérstaka athygli í aðdraganda mótsins:
60 m hlaup kvenna
Það verður spennandi að fylgjast með Christinu Ölbu Marcus Hafliðadóttur í 60 m hlaupi kvenna, þar sem búast má við mikilli baráttu í hröðustu grein mótsins. 60 metrarnir eru alltaf áhorfendavæn grein þar sem sekúndubrot skipta öllu máli, og oft munar mjög litlu á efstu sætunum. Christina er búin að vera stöðugt að bæta sig og er einungis 0,06 sek frá Íslandsmeti Guðbjargar Jónu Bjarnadóttur. Guðbjörg hefur verið að æfa í Svíþjóð og hefur sett meiri fókus á 400m, en hún mætir til landsins og fáum við að sjá hana þar. Hún hleypur 400 m laugardaginn 28. febrúar kl. 15:05
Undanrásir í 60 m hlaupi kvenna fara fram laugardaginn 28. febrúar kl. 13:20
Úrslit í 60 m hlaupi kvenna fer fram laugardaginn 28. febrúar kl. 14:35
Besti árangur á tímabili: Christina Alba Marcus Hafliðadóttir, 7,41 sek
Fyrri Íslandsmeistari: Eir Chang Hlésdóttir, 7,53 sek
Íslandsmet: Guðbjörg Jóna Bjarnadóttir, 7,35 sek
60 m hlaup karla
60 m hlaup karla verður ein mest spennandi grein mótsins, þar sem litlu munar á milli keppenda. Viðbrögð og góð byrjun skipta gríðarlegu máli og oft munar mjög litlu á milli efstu sæta. Á startlista eru meðal annars Daníel Ingi Egilsson, Kristófer þorgrímsson, og fleiri sterkir hlauparar, þannig að búast má við harðri baráttu um úrslitasætin.
Undanrásir í 60 m hlaupi karla fara fram laugardaginn 28. febrúar kl. 13:00
Úrslit í 60 m hlaupi karla fer fram laugardaginn 28. febrúar kl. 14:45
Besti árangur á tímabili: Daníel Ingi Egilsson, 6,83 sek
Fyrri Íslandsmeistari: Gylfi Ingvar Gylfason, 6,98 sek
Íslandsmet: Kolbeinn Höður Gunnarsson, 6,68 sek
200m hlaup kvenna
Eir Chang Hlésdóttir verður meðal þeirra sem keppa í 200 m hlaupi kvenna. Hún hefur verið í góðu formi og verður áhugavert að sjá hvað hún gerir á MÍ innanhúss í ár. Hún keppti á Norðurlandameistaramóti innanhúss í Svíþjóð fyrr í vetur, þar sem hún varð önnur í mark á glæsilegu nýju Íslandsmeti, 23,54 sek. Þar bætti hún eigið met og verður spennandi að sjá hlaupið hennar um helgina.
200 m hlaup kvenna fer fram sunnudaginn 1. mars kl. 13:00
Besti árangur á tímabili: Eir Chang Hlésdóttir, 23,54 sek
Fyrri Íslandsmeistari: Eir Chang Hlésdóttir, 23,69 sek
Íslandsmet: Eir Chang Hlésdóttir, 23,54 sek
200m hlaup karla
200 m hlaup karla lofar góðu um helgina, þar sem margir sterkir hlauparar eru skráðir til leiks. Meðal keppenda eru m.a. Kristófer Þorgrímsson, Ívar Kristinn Jasonarson, Gabríel Glói Freysson, og Kjartan Óli Bjarnason. Einnig mætir Daníel Ingi Egilsson en hann á ekki nýlegan tíma í 200m, svo það verður forvitnilegt að sjá hvar hann lendir.
200 m hlaup karla fer fram sunnudaginn 1. mars kl. 13:20
Besti árangur á tímabili: Ívar Kristinn Jasonarson, 22,12 sek
Fyrri Íslandsmeistari: Arnar Logi Brynjarsson, 22,18 sek
Íslandsmet: Kolbeinn Höður Gunnarsson, 21,03 sek
60 m grind kvenna
Í 60 m grind kvenna má búast við hörkukeppni. Grindahlaupin eru jafnan mjög spennandi og þar getur allt ráðist á tækni yfir grindurnar. Þetta er grein þar sem oft munar afar litlu á efstu keppendum. Gaman verður að fylgjast með Ísold og Maríu þar sem það munar einungis 0,03 sek á milli bestu tíma þeirra í ár, Ísold hefur hlaupið á 8,75 sek og María á 8,78 sek. Þær mætast einnig í hástökki, þar sem einnig má búast við jafnri keppni. Hástökk kvenna fer fram sunnudaginn 1. mars kl 14:00.
60 m grind kvenna fer fram sunnudaginn 1. mars kl. 14:35
Besti árangur á tímabili: Júlía Kristín Jóhannesdóttir, 8,25 sek
Fyrri Íslandsmeistari: Ísold Sævarsdóttir, 8,77 sek
Íslandsmet: Júlía Kristín Jóhannesdóttir, 8,25 sek
800 m hlaup karla
800 m hlaup karla gæti orðið ein af áhugaverðari hlaupakeppnum helgarinnar. Meðal keppenda eru meðal annars Fjölnir Brynjarsson og Leó Örn Þórarinsson, sem eru með sterkustu tímana á listanum, auk fleiri keppenda sem geta blandað sér í baráttuna. Það má því búast við harðri keppni og spennandi lokaspretti. Í þessari grein getur taktík ráðið miklu og því verður áhugavert að sjá hvernig hlaupið þróast frá fyrstu metrum.
800 m hlaup karla fer fram sunnudaginn 1. mars kl 14:10
Besti árangur á tímabili: Leó Örn Þórarinsson, 1:53,56
Fyrri Íslandsmeistari: Daði Arnarson, 1:56,33
Íslandsmet: Björn Margeirsson, 1:51,07
800 m hlaup kvenna
Í 800 m hlaupi kvenna verður sérstaklega gaman að fylgjast með Anítu Hinriksdóttur Íslandsmethafa, sem mætir til landsins til að keppa á MÍ innanhúss. Hún er með sterkasta árangurinn og það verður fróðlegt að sjá hvernig hlaupið þróast. Þá eru einnig skráðar til leiks sterkir hlauparar á borð við Elínu Sóley Sigurbjörnsdóttur og Íris Dóru Snorradóttur, sem geta gert hlaupið enn áhugaverðara.
800 m hlaup kvenna fer fram sunnudaginn 1. mars kl 14:05
Besti árangur á tímabili: Aníta Hinriksdóttir, 2:04.12
Fyrri Íslandsmeistari: Helga Lilja Maack, 2:17,42
Íslandsmet: Aníta Hinriksdóttir, 2:01.18
Þrístökk kvenna
Í þrístökki verður gaman að fylgjast með Irmu Gunnarsdóttur. Hún hefur verið áberandi í greininni og verður spennandi að sjá hana á stökkva um helgina. Hún er hefur náð gáðum árangri í vetur og aldrei að vita nema að hún nái að bæta sig og Íslandsmet sitt.
Þrístökk kvenna fer fram sunnudaginn 1. mars kl. 14:00
Besti árangur á tímabili: Irma Gunnarsdóttir, 13,20 m
Fyrri Íslandsmeistari: Irma Gunnarsdóttir, 13,31 m
Íslandsmet: Irma Gunnarsdóttir, 13,36 m
Kúluvarp karla
Í kúluvarpi karla verður spennandi að fylgjast með Guðna Val Guðnasyni, sem mætir til landsins til að keppa. Hann styrkir mótið enn frekar og verður áhugavert að sjá hvað hann gerir í hringnum um helgina.
Kúluvarp karla fer fram laugardaginn 28. febrúar kl. 14:30
Besti árangur á tímabili: Guðni Valur Guðnason, 18,04 m
Fyrri Íslandsmeistari: Kristján Viktor Kristinsson, 14,73 m
Íslandsmet: Pétur Guðmundsson, 20,66 m
Kúluvarp kvenna
Í kúluvarpi kvenna er Erna Sóley Gunnarsdóttir sigurstranglegust. Hún er ein af fremstu keppendum landsins og það verður spennandi að fylgjast með henni í hringnum á MÍ innanhúss.
Kúluvarp kvenna fer fram sunnudaginn 1. mars kl. 14:20
Besti árangur á tímabili: Erna Sóley Gunnarsdóttir, 17,63 m
Fyrri Íslandsmeistari: Erna Sóley Gunnarsdóttir, 17,41m
Íslandsmet: Erna Sóley Gunnarsdóttir, 17,92 m
BOÐHLAUP KARLA OG KVENNA
4×200 m boðhlaupin skapa jafnan mikla stemningu og geta orðið sannkallaðar úrslitagreinar undir lok mótsins. Þar skipta bæði hraði og skiptingar miklu máli, auk þess sem breidd félaganna kemur sterkt inn. Boðhlaupin geta því haft veruleg áhrif á lokamynd stigakeppninnar.
Boðhlaup fara fram sunnudaginn 1. mars kl. 15:30 og 15:40
Íslandsmet félagslið karla: 1:27.94
Íslandsmet félagsliða kvenna: 1:38.29
Hvar og hvenær?
Meistaramót Íslands 2026
📍 Laugardalshöll
📅 28. febrúar – 1. mars 2026
Drög að tímaseðli eru í Roster og endanlegur tímaseðill verður birtur 26. febrúar
Við hvetjum allt áhugafólk um frjálsar til að mæta í Laugardalshöllina um helgina og fylgjast með baráttunni um Íslandsmeistaratitlana.