Evrópumeistaramót EM U23 hófst í dag en það fer fram í Bergen í Noregi dagana 17.-20. júlí. Ísland á fimm keppendur á mótinu í ár og fjórar þeirra kepptu strax í dag.
Arndís Diljá Óskarsdóttir náði bestum árangri íslensku keppendanna í dag en hún keppti í undankeppni spjótkastsins. Þar kastaði hún lengst 51,05 m og er með tíunda lengsta kastið inn í úrslitin sem fara fram á laugardaginn 19. júlí klukkan 18:55. Þetta er frábært hjá Arndísi Diljá og gaman að sjá hvað hún gerir á laugardaginn í úrslitunum.
Við heyrðum aðeins frá Arndísi Diljá eftir daginn til að heyra hvernig hún væri stemmd og hvernig úrslitin á laugardaginn legðust í hana. „Markmiðið var að komast í úrslit og það er ótrúlega gaman að hafa náð því! Ég fann ekki alveg „feelinginn“ sem ég vildi í dag, en það er frábært að árangurinn dugði til úrslita. Nú er það bara að ýta á reset, stilla fókusinn og negla á þetta í úrslitunum!“ sagði Arndís Diljá sátt eftir daginn.
Júlía Kristín Jóhannesdóttir keppti í undanriðlum 100 m grindahlaups og var hún í fjórða í mark í fjórða riðli á tímanum 13,75 sek. Hún var aðeins fjórum sætum frá því að komast í undanúrslitin en 24 efstu konurnar keppa í þeim á morgun.
Hástökkvararnir okkar náðu sér ekki alveg á strik í dag þegar undankeppnin í hástökki kvenna fór fram. Eva María Baldursdóttir endaði þar í 15. sæti en hún stökk 1,77 m. Þetta er fyrsta Evrópumeistaramót Evu Maríu og hún var ansi nálægt því að komast áfram í úrslitin, eða aðeins einni hæð og einu sæti, en það voru 14 keppendur sem stukku 1,81 m og komast því áfram í úrslit. Birta María Haraldsdóttir stökk 1,73 m og endaði í 25. sæti.
Heildarúrslit dagsins má sjá hér.
Myndir frá deginum má sjá hér.
Við heyrðum líka í Írisi Berg Bryde, aðalfararstjóra hópsins, varðandi hópinn sem keppir fyrir Íslands hönd í ár og stuðið og stemninguna hjá hópnum og á vellinum. „Hópurinn er hrikalega vel stemmdur enda ótrúlega metnaðarfullar íþróttakonur sem við erum með hérna. Þetta var vissulega langur dagur í steikjandi hita en það hafði ekki áhrif á okkar konur enda voru þær ótrúlega spenntar að fá að stíga á tartanið góða og sýna hvað í þeim býr. Næst á dagskrá er svo undankeppni hjá Heru og úrslit hjá Arndísi og við erum með frábært fólk hérna úti, fjölskyldu og vini, sem peppar þær áfram þar til röddin fer. Við finnum fyrir þessum góðu straumum frá Íslandi og biðjum alla að halda áfram að senda þá til okkar“, segir Íris um þennan flotta hóp sem er úti í Bergen.
Flottur fyrsti keppnisdagur hjá okkar konum úti í Bergen og við bíðum heldur betur spennt eftir laugardeginum! Hera Christensen keppir í undankeppni kringlukastsins á laugardaginn klukkan 12:10 (hópur A)/13:20 (hópur B) og úrslitin hjá Arndísi Diljá í spjótkastinu eru klukkan 18:55.