Unnar Vilhjálmsson fékk fálkaorðuna á þjóðhátíðardaginn
Eins og hefð er fyrir þá sæmdi forseti Íslands 15 Íslendinga heiðursmerki hinnar íslensku fálkaorðu við hátíðlega athöfn á Bessastöðum 17. júní sl. Hin íslenska fálkaorða er æðsta heiðursorða Íslands og er veitt einstaklingum sem hafa unnið þjóðinni gagn með störfum sínum, hvort sem er á sviði menningar, vísinda, íþrótta, stjórnmála, góðgerðarmála eða annars samfélagslegs framlags.
Að þessu sinni áttu frjálsíþróttirnar sinn fulltrúa, en Unnar Vilhjálmsson frjálsíþróttaþjálfari og menntaskólakennari á Akureyri var einn orðuhafa að þessu sinni fyrir framlag sitt til íþrótta- og félagsstarfa með börnum.
Unnar hefur stundað frjálsar íþróttir frá unga aldri og átti erfitt með að velja á milli greina enda allar greinar skemmtilegar. Hann var í landsliði Íslands bæði sem keppandi í hástökki og síðar í tugþraut. Hann setti íslandsmet í hástökki á Landsmóti UMFÍ í Keflavík 1984 stökk 2.12 m. Unnar hefur þjálfað frjálsar yfir 35 ár hjá UÍA, HSÞ, UMSS, og síðan 2003 hjá UFA (Texti fenginn að láni frá www.ufa.is).
Andrea Kolbeinsdóttir bætir eigið Íslandsmet í 5 km götuhlaupi
Andrea Kolbeinsdóttir (ÍR) gerði sér lítið fyrir og bætti eigið Íslandsmet í 5 km götuhlaupi í Miðnæturhlaupi Suzuki sem fram fór sl. fimmtudag í Laugardalnum. Andrea kom í mark á 16:18 mínútum og bætti eldra Íslandsmetið um 9 sekúndur, en það var frá árinu 2023. Innilega til hamingju Andrea!
HSK/Selfoss varði Íslandsmeistaratitil sinn á Meistaramóti Íslands 15-22 ára
Meistaramót Íslands 15-22 ára fór fram á ÍR vellinum um helgina, við allskonar veðuraðstæður eins og búast má við á Íslandi. En okkar frábæra unga frjálsíþróttafólk lét það ekki stoppa sig og mætti hresst og kátt á völlinn. HSK/Selfoss sigraði stigakeppni félagsliða með hlutu 423 stig, ÍR-ingar urðu í öðru sæti með 372,5 stig og FH-ingar enduðu í þriðja sæti með 351 stig. Þetta er í fimmta sinn í röð sem lið HSK/Selfoss vinnur heildarstigakeppnina á Meistaramóti Íslands 15-22 ára. Glæsilegur árangur og óskum við þeim innilega til hamingju með titilinn.
Evrópubikar hefst á morgun
Þá styttist heldur betur í mikilvægasta landliðsverkefni ársins, sjálfan Evrópubikar. Ísland keppir í 3. deild í ár ásamt 14 öðrum landsliðum og komast efstu þrjú liðin upp um deild og keppa þá í 2. deild á næsta Evrópubikar. Keppni í 3. deild fer fram 24. og 25. júní í Maribor í Slóveníu og mætti íslenska liðið á svæðið snemma í fyrramálið eftir ansi langt og strangt ferðalag. Íslenska liðið í ár samanstendur af 33 íþróttamönnum, 16 körlum og 17 konum og á liðið góðan möguleika á að komast upp um deild. Við sendum okkar frábæra frjálsíþróttafólki alla okkar góðu straumi fyrir komandi keppni. Áfram Ísland!