Júlía Kristín Jóhannesdóttir (Breiðablik) setti föstudaginn 13. febrúar nýtt Íslandsmet í 60 metra grindahlaupi þegar hún hljóp á 8,25 sekúndum á Tyson Invitational í Fayetteville, Arkansas. Með tímanum bætti hún 30 ára gamalt met Guðrúnar Arnardóttur (8,31) sem hafði staðið frá 1996. Júlía hljóp einnig á 8,31 sekúndum í undanúrslitum sem var jöfnun á íslandsmetinu.
Júlía, sem stundar nám og keppir með Rice University í Bandaríkjunum, hafnaði í 5. sæti í úrslitum í gríðarlega sterku hlaupi þar sem nokkrir keppendur voru á sama tíma og munaði örlitlu. Júlía sló einnig skólamet en Andrea Blackett hljóp á 8.28 sekúndum árið 1997.
Hér er hægt að sjá færslu Júlíu á Instagram, þar sem myndband fylgir af hlaupinu.
„Ég vildi gefa mér sem flest tækifæri“
„Ég keppti alltaf í 60 metra grind á öllum mótum til að gefa mér sem flest tækifæri til að bæta mig,“ segir Júlía. Hún lýsir því að á síðustu mótum hafi hún verið komin í ákveðinn takt þar sem tíminn var í kringum 8,37–8,39 þrjár helgar í röð.
„Mig vantaði að komast út úr þessum takti og ná aðeins meiri hraða ef ég ætlaði að slá metið. Seinustu helgina small það loksins þegar ég hljóp 8,31 í undanúrslitum og síðan 8,25 í úrslitunum,“ bætir hún við.
Fjölbreyttar æfingar skila sér í grindinni
Aðspurð um hvað hafi skilað sér mest í vetur segir Júlía að það hjálpi henni að æfa fleiri greinar en eingöngu grindahlaup.
„Það þróar mismunandi styrkleika eins og hraða, samhæfingu og kraft sem nýtast mér vel í grindinni, og ég finn að það skilar sér inn í hlaupin,“ segir hún.
„Vonandi standi metið ekki of lengi“
Metið sem Júlía bætti hafði staðið í um 30 ár og segir hún það hafa sérstaka merkingu að slá svona gamalt met.
„Það er mjög gaman að hafa slegið svona gamalt met en ég og pabbi ræddum samt að vonandi standi met ekki of lengi, því það væri merki um að fleiri afreksíþróttamenn á Íslandi séu að standa sig vel,“ segir hún.
Skipulag, rútína og skýr markmið
Júlía leggur einnig áherslu á að undirbúningur og rútína skipti miklu fyrir frammistöðu.
„Ég geri alltaf sömu upphitun fyrir keppni og finnst gott að fylgja henni. Ég er mjög skipulögð og þjálfarinn minn líka. Ég set mér líka markmið fyrir daginn sem hjálpar mér að halda fókus,“ segir hún.
Umhverfið í Bandaríkjunum og hvað er næst
Júlía er á öðru ári í námi við Rice University og segir umhverfið þar styðja vel við afreksíþróttafólk.
„Umhverfið er frábært, það er mjög vel hugsað um íþróttafólkið hér, bæði hvað varðar námið og íþróttirnar. Ég er á öðru ári og er að læra umhverfisverkfræði,“ segir hún.
Varðandi framhaldið segir Júlía að formið sé mjög gott og að hún telji sig eiga meira inni.
„Það er að minnsta kosti eitt mót eftir á innanhústímabilinu og þar keppi ég í fimmtarþraut og grind. Markmiðið er að halda áfram á þessari braut og reyna að bæta tímann enn frekar. Annars er ég mjög spennt fyrir utanhústímabilinu,“ segir hún.