Þann 5. nóvember fer fram heimsmeistaramótið í utanvegahlaupum sem í þetta skiptið verður haldið í Chiang Mai í Tælandi. Allir sterkustu utanvegahlauparar heims taka þátt í mótinu. Keppt verður í tveimur vegalengdum í fjalllendi Chiang Mai þ.e. 40 km og 80 km utanvegahlaupi með um það bil 2500 og 5000m hækkun. Frjálsíþróttasamband Íslands sendir fimm keppendur af hvoru kyni á mótið og það er ljóst að þeirra bíður verðugt verkefni í hitanum og rakanum í Tælandi.
Landslið Íslands er gífurlega sterkt þetta árið en liðið skipa:
- Andrea Kolbeinsdóttir
- Sigþóra Brynja Kristjánsdóttir
- Elísabet Margeirsdóttir
- Íris Anna Skúladóttir
- Rannveig Oddsdóttir
- Halldór Hermann Jónsson
- Sigurjón Ernir Sturluson
- Þorbergur Ingi Jónsson
- Þorsteinn Roy Jóhannsson
- Þórólfur Ingi Þórsson.
- Friðleifur Friðleifsson, liðsstjóri
Árangur undanfarinna ára sýnir að Ísland hefur á að skipa mjög öflugum hlaupurum sem geta veitt þeim allra bestu í heimi verðuga keppni. Utanvegahlaup eru vaxandi íþrótt um allan heim og það er ánægjulegt hversu góður árangur íslenskra utanvegahlaupara er orðinn.
Hægt verður að fylgjast með ferðalagi liðsins og keppninni á Facebook síðu landsliðsins og einnig á heimasíðu Frjálsíþróttasambandsins.