Það var sannkallaður hátíðardagur á Hrolllaugsstöðum í Suðursveit á laugardaginn en þar fór fram Vígslumót Vísisvallar. Fyrirkomulag mótsins var til fyrirmyndar og gleðin leyndi sér ekki hjá keppendum og sjálfboðaliðum.
Ótrúleg saga
Vígslumótið fór fram nákvæmlega ári frá fyrstu skóflustungu. Á þessu ári hefur Bjarni Malmquist, ásamt öflugu fólki í Suðursveit, unnið þrekvirki í byggingu Vísisvallar. Það sem gerir þessa sögu einstaka er samstaða samfélagsins við að koma þessum stórhuga hugmyndum í framkvæmd. Völlurinn er með eindæmum glæsilegur og hönnun hans gefur kost á fjölbreytta notkun.
Sögulegur árangur
Christina Alba sigraði 60 metra hlaupið á tímanum 7,51 sek. sem er besti tími frá upphafi utanhúss. Jafnramt náðist besti tími sem skráður hefur verið í 60 metra grindahlaupi karla utanhúss en Davíð Goði Jóhannsson sigraði grindahlaupið á tímanum 10,37 sek. Anna Karen Malmquist Bjarnadóttir skrifaði einnig nafn sitt í sögubækurnar í hjólastólaspretti en þetta var í fyrsta skipti sem keppt er í 60 metra hjólastólaspretti kvenna utanhúss.
Skemmtileg keppni
Keppendur voru á öllum aldri og komu alls staðar af landinu. Sumir keppendur voru að stíga sín fyrstu skref í frjálsíþróttum, aðrir höfðu tekið skóna af hillunni og einnig var sumt af fremsta frjálsíþróttafólki landsins mætt á staðinn. Keppt var í 60 metra hlaupi, hjólastólaspretti, grindahlaupi, hástökki, langstökki, stangarstökki, kúluvarpi, boltakasti, spjótkasti, sleggjukasti og kringlukasti.
Bjarni sæmdur silfurmerki FRÍ
Á setningarathöfn mótsins var Bjarni Malmquist sæmdur silfurmerki FRÍ fyrir framlag sitt. Sveinn Margeirsson, formaður FRÍ, hélt tölu og færði Bjarna grenitré til að gróðursetja við vallarsvæðið. Auk þess afhenti Björg Gunnarsdóttir, fræðslu- og útbreiðlustjóri FRÍ, Ungmennafélaginu Vísi boðhlaupskefli í gjöf.
Við viljum óska Bjarna, Ungmennafélaginu Vísi og öllum þeim sem komu að uppbyggingu vallarins innilega til hamingju!