Frjálsíþróttasamband Íslands hefur ráðið tvo nýja starfsmenn til starfa á skrifstofu sambandsins. Það eru þau Kormákur Ari Hafliðason og Björg Gunnarsdóttir, sem munu bæði koma að mikilvægum verkefnum á sviði útbreiðslu, fræðslu, viðburða og miðlunar.
Kormákur Ari Hafliðason
Kormákur Ari er ráðinn í fullt starf og mun leiða útbreiðslumál og viðburðamál sambandsins. Hann mun jafnframt sinna hlaupahópum, hlaupahöldurum og þeim sem eru í uppbyggingarstarfi víðs vegar um land. Samhliða þessu verður hann ritstjóri fri.is og mun stýra miðlunarteymi sambandsins í tengslum við mót, viðburði og kynningarstarf.
Kormákur á að baki farsælan landsliðsferil í frjálsíþróttum og hefur keppt fyrir FH. Hann er að ljúka International Sport Management námi í Haag og hóf hann störf 1. febrúar.
Björg Gunnarsdóttir
Björg er ráðin í 50% starf við fræðslu- og útbreiðsluverkefni sambandsins og mun starfa í nánu samstarfi við Kormák. Ljóst er að starfssvið þeirra skarast að hluta og mun þróast áfram fram að sumri.
Björg á einnig landsliðsferil að baki og hefur keppt fyrir ÍR. Hún er kennaramenntuð og hefur á undanförnum árum unnið að öflugri uppbyggingu frjálsíþróttastarfs í Stykkishólmi, þar sem hún hefur aflað sér mikillar reynslu sem þjálfari og stjórnandi.
Björg mun hefja störf á vormánuðum.
FRÍ býður þau innilega velkomin til starfa og er sannfært um að þau verði mikilvæg viðbót við starfsemi sambandsins.
Jafnframt vill FRÍ þakka Soffíu Svanhildar Felixdóttur fyrir mikilvægt framlag til þróunar skrifstofunnar, ekki síst á sviði útbreiðslu- og fræðslumála, og óska henni velfarnaðar á nýjum vettvangi.