Ármenningar Íslandsmeistarar félagsliða 11-14 ára 2025
Meistaramót Íslands 11-14 ára fór fram í Laugardalshöllinni um helgina og þangað mættu frjálsíþróttakrakkar- og unglingar alls staðar að af landinu. Flottur árangur náðist á mótinu og eins og alltaf leit fjöldi persónulegra breytinga dagsins ljós. Það voru Ármenningar sem sigruðu stigakeppnina en í heildina hlutu þau 796,5 stig, en þau urðu einnig stigahæst í fjórum flokkum af átta. Frábærlega vel gert hjá Ármenningum og óskum við þeim innilega til hamingju með þennan flotta árangur. Í öðru sæti varð lið HSK/Selfoss með 511 stig og FH-ingar lentu í því þriðja með 438 stig.
Óskum öllum keppendum til hamingju með árangurinn sinn um helgina.
Heildarúrslit mótsins má sjá hér.
Myndir frá mótinu eru komnar inn á Flickr-síðu FRÍ.
Íslandsmet og sex verðlaun á NM í frjálsíþróttum
Norðurlandameistaramótið innanhúss fór fram í Karlstad í Svíþjóð í gær, sunnudaginn 1. febrúar. Þar tefldi Ísland fram sameiginlegu liði með Danmörku og stóðu íslensku keppendurnir sig mjög vel. Hæst ber að nefna árangur Eirar Chang Hlésdóttur í 200 m hlaupinu en þar kom hún önnur í mark á glæsilegu nýju Íslandsmeti, 23,54 sek., og bætti þar tæplega ársgamalt eigið met um 15 sekúndubrot. Auk þessara silfurverðlauna þá hlutu íslensku keppendurnir fimm önnur verðlaun.
- Erna Sóley Gunnarsdóttir vann kúluvarp með kasti upp á 16,89 m.
- Guðrún Karítas Hallgrímsdóttir lenti í öðru sæti í lóðkasti þar sem hún kastaði 23,01 m.
- Hilmar Örn Jónsson varð þriðji í lóðkasti með kasti upp á 21,83 m.
- Irma Gunnarsdóttir lenti í þriðja sæti í þrístökki þar sem hún stökk 13,20 m
- Helga Þóra Sigurjónsdóttir hafnaði í þriðja sæti í hástökki en hún stökk 1,77 m.
Heildarúrslit mótsins má sjá hér.
Aldursflokkamet og EMU18 lágmark
Frjálsíþróttafólkið í Bandaríkjunum hefur verið að gera góða hluti undanfarið. Júlía Kristín Jóhannesdóttir, sem margbætti aldursflokkametið í 60 m grindahlaupi á síðasta ári, byrjar árið af krafti og hefur núna í janúar tvíbætt aldursflokkametið. Helgina 23.-24. janúar lenti hún í 2. sæti í 60 m grindahlaupi á Ted Nelson Invitational á tímanum 8,38 sek sem er bæting á aldursflokkametinu um sjö sekúndubrot. Núna um liðna helgi keppti hún svo á Robert Platt Invitational og bætti metið um eitt sekúndubrot þegar hún kom í mark á 8,37 sek. Júlía Kristín færist alltaf nær og nær 30 ára gömlu Íslandsmeti Guðrúnar Arnardóttur sem er 8,31 sek frá árinu 1996.
Talandi um Guðrúnu Arnardóttur þá var sonur hennar Magnús Elías Harvard að setja aldursflokkamet í stangarstökki í flokki 16-17 ára þegar hann stökk yfir 4,60 m á móti í Bandaríkjunum fyrir rúmri viku síðan. Ekki nóg með að setja aldursflokkamet heldur náði hann lágmarki inn á EMU18 með þessum árangri sínum og er því á leiðinni til Ítalíu að keppa um miðjan júlí nk. Frábærlega vel gert hjá honum Magnúsi.
Hvað er framundan?
Eins og ávallt á þessum tíma árs þá eru flestar helgar fullar af frjálsíþróttafjöri og er næsta helgi engin undantekning þar á. En helgina 7.-8. febrúar fer hið árlega Stórmót ÍR fram í Laugardalshöllinni.