Verkleg helgi
Fyrsta stigs þjálfaranámskeið FRÍ hófst 5. mars, námskeiðið er fjarnám með einni verklegri helgi sem var síðastliðna helgi, 13.-14. apríl. Þetta er ætlað þeim sem sjá einna helst um þjálfun barna 12 ára og yngri. Farið er yfir vöxt og þroska barna, þjálfunarhætti, langtímaþróun, þjálfarahlutverkið auk grunns í frjálsíþróttagreinum.
Stefnan er sett á að annað fyrsta stigs námskeið verði haldið þegar nær dregur hausti og jafnframt stefnt að því að annars stigs námskeið verði haldið í framhaldi af því.
„Þetta gekk bara ljómandi vel, þarna voru þjálfarar sem eru að þjálfa í dag og einnig einstaklingar sem eru að stíga sín fyrstu skref. Hreyfingin er mjög heppin að fá þessa áhugasömu einstaklinga til liðs við okkur,“ sagði Gunnhildur Hinriksdóttir nefndarformaður fræðslunefndar en hún sá um verklega hlutann.
Þjálfunarmenntun ÍSÍ
Til þess að geta tekið þjálfaranámskeið hjá FRÍ þarf að hafa lokið almenna hlutanum hjá ÍSÍ. Menntun á hverju stigi lýkur þegar almenna hlutanum hjá ÍSÍ er lokið og sérgreinahlutanum hjá FRÍ eða viðkomandi sérsambandi. Þegar öllum þremur stigunum er lokið gefur þjálfaramenntun ÍSÍ réttindi til íþróttaþjálfunar.
Þjálfaramenntun ÍSÍ er áfangaskipt fræðslukerfi, þjálfarastigin þrjú og aldurstakmörk eru á hverju stigi.
- Stig – 16 ára
- Stig – 18 ára
- Stig – 20 ára
Hægt er að lesa nánar um þjálfaramenntun ÍSÍ hér.
Mat á öðru námi
Hægt er að senda á ÍSÍ upplýsingar um menntun og reynslu og fengið sig metna inn í þjálfaramenntun ÍSÍ. Sérsamböndin sjá um mat á sérgreinaþætti menntunar íþróttaþjálfara.