Hið víðfræga Víðavangshlaup ÍR fer fram venju samkvæmt á sumardaginn fyrsta, fimmtudaginn 24. apríl nk. Víðavangshlaupið er fastur liður í hlaupasumri margra hlaupara enda frábært að byrja sumarið á skemmtilegu 5 km hlaupi um miðborg Reykjavíkur. Í ár verður boðið uppá nýja hlaupaleið þar sem startið og mark verða í Vonarstræti og er hlaupið ræst klukkan 12. Nánari upplýsingar um hlaupið, hlaupaleiðina og skráningu í hlaupið má sjá hér.
Meistaramót Íslands í 5 km fer fram samhliða Víðavangshlaupinu og er keppt um titilinn Íslandsmeistari í kvenna-og karlaflokki, og auk þess gefst tækifæri til þess að bæta í hnappagatið Íslandsmeistaratitli í aldursflokkum.
Athygli er vakin á að einungis íslenskir ríkisborgarar sem eru skráðir í aðildarfélag innan FRÍ geta orðið Íslandsmeistarar og/eða Íslandsmeistarar í aldursflokki. Þátttakendur sem stefna á sigur eru hvattir til þess að huga að því að vera skráðir í aðildarfélag og að klæðast aðildabúningi á keppnisdegi.
Vonumst eftir góðu veðri og góðri stemmingu í miðbæ Reykjavíkur á sumardaginn fyrsta þar sem við fögnum komu sumars og störtum frábæru hlaupasumri.