Á morgun, 24. júní, hefst keppni í 3. deild Evrópubikars í Maribor í Slóveníu. Þar keppir íslenska landsliðið við 14 önnur landslið, en þau eru Albanía, Andorra, Armenía, Aserbaísjan, Bosnía og Hersegóvína, Georgía, Kósovó, Liechtenstein, Lúxemborg, Malta, Svartfjallaland, Moldóva, Norður Makedónía og San Marinó.
Mótið er tveir dagar, þriðjudagur og miðvikudagur, og á morgun er keppt í 20 greinum. Athugið að allar tímasetningar hér að neðan eru að staðartíma, en Maribor er tveimur tímum á undan okkur á Íslandi.
Hilmar Örn Jónsson verður fyrstur út á völlinn, en sleggjukast karla er fyrsta keppnisgreinin og hefst hún kl. 14:30. Það má búast við hörkukeppni á milli Hilmars og Serghei Marghiev frá Moldóvu en aðeins 20 cm skilja að ársbesta hjá þeim, Hilmar er búinn að kasta lengst í ár 74,59 m og Serghei 74,79 m. Hilmar er Íslandsmethafi í sleggjukasti en Íslandsmet hans er 77,10 m frá því í lok ágúst 2020.
Langstökk karla hefst klukkan 14:50 en þar stekkur Daníel Ingi Egilsson og er hann með annað lengsta stökk ársins, þannig að líklegt er að hann blandi sér í toppbaráttuna í langstökkinu. En hann hefur stokkið lengst í ár 7,63 m, en hans lengsta stökk er Íslandsmetsstökk hans frá því í fyrra vor þegar hann stökk 8,21 m.
Fyrsta hlaupagrein morgundagsins er 400 m grindahlaup kvenna og þar verður Ingibjörg Sigurðardóttir meðal keppenda en hún á fjórða besta árangurinn, en hennar ársbesta er 61,57 sek en best á hún 59,48 sek frá því í júlí 2024. 400 m grindahlaup kvenna hefst klukkan 15:45, en Ingibjörg er í seinni riðlinum sem fer af stað klukkan 15:53.
Í stangarstökki kvenna, sem hefst klukkan 16:00, keppir Karen Sif Ársælsdóttir, en hún á bestan skráðan árangur þeirra keppenda sem taka þátt í stangarstökkinu. En hennar besti árangur er 3,80 m frá því fyrr á þessu ári.
Ívar Kristinn Jasonarson keppir í 400 m grindahlaupi klukkan 16:13, er í seinni riðlinum, og á hann besta skráðan árangur keppenda í hlaupinu. Besti tíminn hans á árinu er 51,74 sek en besti tíminn hans er 51,43 sek frá því sumarið 2023.
Kringlukast kvenna hefst klukkan 16:20 og þar er Hera Christensen meðal keppenda og hún á annan besta árangur keppenda, hennar ársbesta er 49,84 m og er það aðeins 12 cm lengra en árangur Jule Insinna frá Liechtenstein sem er með þriðja besta árangur ársins, þannig að það má búast við spennandi keppni í kringlukastinu. Hera á best 52,67 m og er það frá því í fyrrasumar.
100 m hlaup karla hefst klukkan 16:25 og þar mætir Kristófer Þorgrímsson á brautina en hann á best í ár 10,76 sek sem er fimmti besti tími skráðra keppenda, en hann á best 10,58 sek frá því síðasta sumar. Kristófer er í seinni riðlinum sem ræstur verður klukkan 16:32.
Sigursteinn Ásgeirsson er meðal keppenda í kúluvarpi karla sem hefst klukkan 16:30, en hann á sjötta besta árangur skráðra keppenda. Lengst hefur Sigursteinn kastað 17,35 m og gerði hann það í maí sl.
Í 100 m hlaupi kvenna, sem hefst klukkan 16:45, keppir Eir Chang Hlésdóttir, en hún er í seinni riðlinum sem fer af stað klukkan 16:52. Hennar besti tími er 12,01 sek frá því fyrr í sumar. Þetta er fimmti besti tími skráðra keppenda. Það er spurning hvort að þetta verði mótið þar sem Eir fer undir 12 sekúndurnar í 100 m hlaupi
Klukkan 17:10 er komið að 800 m hlaupi kvenna og þar mætir á brautina Aníta Hinriksdóttir í seinni riðlinum sem fer af stað 17:20, en hún á langbesta tíma þeirra sem skráðar eru til leiks. Í ár hefur hún hlaupið best á 2:03,71 mín en best á hún 2:00,05 mín frá því árið 2017.
Næst er það 1500 m hlaup karla klukkan 17:35 og þar mætir Hlynur Andrésson til leiks en hann á best 3:45,97 mín frá því árið 2017 og er það annar besti tími skráðra keppenda í hlaupinu, en Hlynur hefur ekki hlaupið 1500 m á þessu ári.
Hástökk karla hefst klukkan 17:50 og þar stekkur Þorleifur Einar Leifsson, en hann á best í ár 1,95 m, sem er einnig hans besti árangur yfir allt, og er þetta sjötti besti árangur ársins meðal þeirra keppenda sem skráðir eru.
Guðbjörg Jóna Bjarnadóttir er meðal keppenda í 400 m hlaupi kvenna sem byrjar klukkan 17:50, en hún er í seinni riðlinum sem ræstur er klukkan 18:00. Hennar ársbesta er 54,84 sek og er það annar besti árangur skráðra keppenda.
Næst er komið að langstökki kvenna, en það hefst klukkan 18:05, og þar er Birna Kristín Kristjánsdóttir á meðal keppenda. Birna Kristín hefur stokkið lengst í ár 6,36 m sem er annar besti árangur skráðra keppenda. Hún á best 6,46 m frá því síðasta sumar, og er það aðeins 2 cm styttra en besti árangur Rachela Pace frá Möltu sem á bestan árangur skráðra keppenda. Þetta gæti því orðið spennandi langstökkskeppni.
Í 400 m hlaupi karla mætir Sæmundur Ólafsson á brautina, en það hefst klukkan 18:10, en Sæmundur er í seinni riðlinum sem fer af stað klukkan 18:20. Í ár hefur Sæmundur hraðast hlaupið á 48,83 sek og er það sjötti besti árangur keppenda, en besti tíminn hans er frá sumrinu 2023 en þá hljóp hann á 48,63 sek.
Arndís Diljá Óskarsdóttir keppir í spjótkasti kvenna klukkan 18:25, en hún hefur verið á svakalegri siglingu undanfarið og bætt sig mikið. Lengst hefur hún kastað 54,99 m og gerði hún það fyrr í sumar, en þessi árangur er besti árangur skráðra keppenda.
Baldvin Þór Magnússon mætir aftur á brautina kl. 18:30 þegar 5000 m hlaup karla fer fram. En hann er Íslandsmethafi í greininni með tímann 13:20,34 mín frá því vorið 2024. Þetta er langbesti tími skráðra keppenda í greininni, en Baldvin hefur ekki keppt í 5000 m hlaupi á þessu ári á því ekkert ársbest.
Andrea Kolbeinsdóttir keppir í 3000 m hindrunarhlaupi kvenna klukkan 18:55, en hún er Íslandsmethafi í greininni með tímann 10:08,85 mín frá því sumarið 2023. Þetta er þriðji besti tími skráðra keppenda í greininni, en Andrea hefur ekki keppt í 3000 m hindrunarhlaupi í ár og á því ekki ársbesta tíma. Andrea er greinilega í hörkuformi þessa dagana en hún er nýbúin að bæta Íslandsmetið í 5 km götuhlaupi.
Lokagreinar morgundagsins eru svo 4×100 m boðhlaup kvenna og karla. Konurnar byrja klukkan 19:20 og karlarnir klukkan 19:36. Íslensku kvennasveitina skipa Birna Kristín Kristjánsdóttir, María Helga Högnadóttir, Ísold Sævarsdóttir og Eir Chang Hlésdóttir og íslensku karlasveitina skipa Arnar Logi Brynjarsson, Þorleifur Einar Leifsson, Sveinbjörn Óli Svavarsson og Þorleifur Einar Leifsson.
Það stefnir allt í hörkuspennandi og skemmtilega keppni og okkar fólk er vel stemmt.
Hægt verður að fylgjast með live stream af mótinu hér.
Startlista hverrar greinar fyrir sig er hægt að skoða hér.
Heimasíðu mótsins er að sjá hér.