Fimm íslenskir keppendur taka þátt á heimsmeistaramóti U20 í frjálsíþróttum sem fram fer á Hayward Field í Eugene í Oregon dagana 5.–9. ágúst. Á mótinu koma saman yfir 1.700 af efnilegustu frjálsíþróttamönnum heims frá nærri 200 þjóðum.
Íslenska liðið skipa þau Ísold Sævarsdóttir, Christina Alba Marcus Hafliðadóttir, Eir Chang Hlésdóttir, Bryndís Embla Einarsdóttir og Kjartan Óli Bjarnason.
Ísold keppir í sjöþraut
Ísold Sævarsdóttir úr FH hefur keppni fyrst íslensku keppendanna þegar sjöþrautin hefst miðvikudaginn 5. ágúst. Sjöþrautin fer fram á tveimur dögum og lýkur fimmtudaginn 6. ágúst.
Ísold hefur mikla reynslu af alþjóðlegum stórmótum þrátt fyrir ungan aldur. Hún varð í 12. sæti í sjöþraut á EM U20 í Tampere á síðasta ári, þar sem hún hlaut 5.358 stig. Hún tryggði sér þátttökurétt á HM U20 með góðum árangri í sjöþraut fyrr á þessu ári.
Christina Alba í 100 metra hlaupi
Christina Alba Marcus Hafliðadóttir úr Fjölni keppir í 100 metra hlaupi. Undanrásirnar fara fram miðvikudaginn 5. ágúst og komist hún áfram heldur keppnin áfram fimmtudaginn 6. ágúst.
Christina Alba hefur tekið stór skref á undanförnum misserum. Hún varð Íslandsmeistari í 100 metra hlaupi á 100. Meistaramóti Íslands þegar hún hljóp á 11,83 sekúndum og hefur hlaupið best á 11,80 sekúndum í sumar.
Kjartan Óli í 400 metra hlaupi
Kjartan Óli Bjarnason úr Fjölni keppir í 400 metra hlaupi. Undanrásir greinarinnar fara fram fimmtudaginn 6. ágúst og næsta umferð föstudaginn 7. ágúst.
Kjartan hefur bætt sig mikið á árinu og á best 47,44 sekúndur. Hann varð Íslandsmeistari í greininni á 100. Meistaramóti Íslands þegar hann kom í mark á 48,47 sekúndum.
Eir keppir í 200 metra hlaupi
Eir Chang Hlésdóttir úr ÍR keppir í 200 metra hlaupi. Undanrásir fara fram föstudaginn 7. ágúst og komist Eir áfram fara næstu umferðir fram laugardaginn 8. ágúst.
Eir er Íslandsmetshafi í 200 metra hlaupi, bæði innan- og utanhúss. Hún á best 23,44 sekúndur utanhúss og setti Íslandsmet innanhúss þegar hún hljóp á 23,54 sekúndum fyrr á þessu ári. Eir kemur einnig inn í mótið sem Norðurlandameistari U20 í 200 metra hlaupi.
Bryndís Embla í spjótkasti
Bryndís Embla Einarsdóttir frá Selfossi keppir í spjótkasti. Undankeppnin fer fram föstudaginn 7. ágúst og úrslitin sunnudaginn 9. ágúst.
Bryndís er yngsti keppandinn í íslenska hópnum, fædd árið 2009, og keppir því við allt að tveimur árum eldri keppendur. Hún kemur til Oregon eftir flottan árangur á EM U18 í Rieti, þar sem hún hafnaði í fjórða sæti.
Dagskrá
Dagskrá íslensku keppendanna
| Keppandi | Grein | Oregon | Dagsetning á Íslandi | Íslenskur tími |
|---|---|---|---|---|
| Ísold Sævarsdóttir | Sjöþraut – 100 m grindahlaup | 5. ágúst / 10:00 | 5. ágúst | 17:00 |
| Ísold Sævarsdóttir | Sjöþraut – hástökk | 5. ágúst / 10:50 | 5. ágúst | 17:50 |
| Ísold Sævarsdóttir | Sjöþraut – kúluvarp | 5. ágúst / 18:20 | 6. ágúst | 01:20 |
| Ísold Sævarsdóttir | Sjöþraut – 200 m hlaup | 5. ágúst / 19:35 | 6. ágúst | 02:35 |
| Ísold Sævarsdóttir | Sjöþraut – langstökk | 6. ágúst / 10:25 | 6. ágúst | 17:25 |
| Ísold Sævarsdóttir | Sjöþraut – spjótkast | 6. ágúst / 12:30 | 6. ágúst | 19:30 |
| Kjartan Óli Bjarnason | 400 m – undanriðlar | 6. ágúst / 12:40 | 6. ágúst | 19:40 |
| Ísold Sævarsdóttir | Sjöþraut – 800 m hlaup | 6. ágúst / 18:10 | 7. ágúst | 01:10 |
| Bryndís Embla Einarsdóttir | Spjótkast – undankeppni, riðill A eða B | 7. ágúst / 10:00 eða 11:37 | 7. ágúst | 17:00 eða 18:37 |
| Eir Chang Hlésdóttir | 200 m – undanriðlar | 7. ágúst / 12:15 | 7. ágúst | 19:15 |
Nákvæmur keppnishópur Bryndísar Emblu verður staðfestur þegar endanlegir startlistar liggja fyrir.
Tímasetning undanriðla Christinu Ölbu Marcus Hafliðadóttur í 100 metra hlaupi verður bætt við þegar hún liggur fyrir.
Mögulegar undanúrslita- og úrslitaumferðir
| Grein og umferð | Oregon | Dagsetning á Íslandi | Íslenskur tími |
|---|---|---|---|
| 400 m karla – undanúrslit | 6. ágúst / 19:44 | 7. ágúst | 02:44 |
| 200 m kvenna – undanúrslit | 7. ágúst / 18:55 | 8. ágúst | 01:55 |
| 400 m karla – úrslit | 7. ágúst / 20:53 | 8. ágúst | 03:53 |
| 200 m kvenna – úrslit | 8. ágúst / 20:50 | 9. ágúst | 03:50 |
| Spjótkast kvenna – úrslit | 9. ágúst / 13:48 | 9. ágúst | 20:48 |
Íslensku keppendurnir taka þátt í undanúrslitum og úrslitum komist þeir áfram úr fyrri umferðum.
Oregon er sjö klukkustundum á eftir Íslandi.
HM U20 fer fram á Hayward Field, einum þekktasta frjálsíþróttavelli heims. Eugene hélt einnig HM fullorðinna árið 2022 og HM U20 árið 2014.
FRÍ mun fylgjast vel með íslenska hópnum og birta fréttir og úrslit frá mótinu.