Á 65. Frjálsíþróttaþingi FRÍ voru samþykktar breytingar á reglugerð nr. 35 um val á landsliði í hlaupum utan valla.
Reglugerðin nær til landsliðsvals í götuhlaupum, víðavangshlaupum og utanvega- og fjallahlaupum. Markmið breytinganna er að gera ferlið skýrara fyrir keppendur, félög, þjálfara og aðra sem koma að landsliðsverkefnum.
Lágmörk í götuhlaupum
| Kyn | 10 km | Hálfmaraþon | Maraþon |
|---|---|---|---|
| Konur | 37:19 | 1:23:12 | 2:57:38 |
| Karlar | 30:57 | 1:08:20 | 2:25:02 |
Viðmiðin útiloka ekki að keppandi sem ekki hefur náð lágmarki geti verið valinn, ef fyrir liggur árangur eða geta sem langhlaupanefnd metur sambærilega eða betri.
Viðmið í utanvega- og fjallahlaupum
Við val í utanvega- og fjallahlaupum er áfram stuðst við afrekslista ITRA. Horft er til árangurs síðustu 12 mánaða.
| Kyn | ITRA-viðmið |
|---|---|
| Konur | 670 stig |
| Karlar | 800 stig |
Keppandi skal hafa tekið þátt í utanvegahlaupi sem gefur ITRA-stig á síðustu 12 mánuðum fyrir val.
Víðavangshlaup
Í víðavangshlaupum er kveðið skýrar á um að Íslandsmeistaramót í víðavangshlaupi sé mikilvægur þáttur í vali landsliðs. Langhlaupanefnd getur einnig tekið tillit til annarra víðavangshlaupa, mótaraða eða sambærilegra viðburða, auk árangurs í götu- eða brautarhlaupum innan sama almanaksárs.
Val á landsliði skal tilkynnt eigi síðar en viku eftir að Íslandsmóti lýkur.
Reglugerðin í heild
Reglugerð nr. 35 um val á landsliði í hlaupum utan valla má lesa í heild sinni hér.