Fyrstu mánuðir ársins hafa verið afar viðburðaríkir í íslenskum langhlaupum. Íslandsmet hafa fallið, íslenskir hlauparar staðið sig frábærlega bæði á götum og í utanvegahlaupum og ljóst er að spennandi verkefni eru framundan þegar líða tekur á vorið.
Meðal stærstu afreka ársins hingað til er nýtt Íslandsmet Baldvins Þórs Magnússonar í 10 km götuhlaupi, þegar hann hljóp á 27:40 í Valencia 11. janúar. Þá bætti Hlynur Andrésson eigið Íslandsmet í hálfmaraþoni þegar hann hljóp á 1:02:30 í mars, og Andrea Kolbeinsdóttir vakti mikla athygli með sigri og brautarmeti í móti í Golden Trail World Series í Ástralíu. Nýjasta stóra afrekið kom svo frá Arnari Péturssyni sem stórbætti eigið Íslandsmet í 100 km hlaupi og hljóp á 6:24:53 í Koper í Slóveníu.
Baldvin setti Íslandsmet í 10 km götu
Baldvin Þór Magnússon setti Íslandsmet í 10 km götuhlaupi þegar hann hljóp á 27:40 í Valencia 11. janúar.
Þetta er eitt sterkasta íslenska götuhlaup síðari ára og staðfestir að íslenskir langhlauparar hafa byrjað árið af miklum krafti. Baldvin hefur jafnframt tryggt sér þátttökurétt á Evrópumeistaramótinu í Birmingham, þar sem hann mun keppa í 10 km hlaupi.
Hlynur bætti eigið Íslandsmet í hálfmaraþoni
Hlynur Andrésson setti nýtt Íslandsmet í hálfmaraþoni. Hlynur hljóp vegalengdina á 1:02:30 og bætti þar með eigið met.
Undirbúningur Hlyns fyrir hlaupið hafði gengið afar vel. Hann dvaldi í mánuð í Portúgal með hópi hlaupara þar sem hann æfði markvisst fyrir komandi verkefni, án þess að veikindi eða meiðsli trufluðu undirbúninginn.
Hlynur fór hraðar af stað en upphaflega stóð til, eftir að hafa ákveðið að fylgja hraða sem stefndi á 61:45 lokatíma. Hann fór í gegnum 5 km á 14:42 og 10 km á 29:26, sem eru mjög sterkir millitímar, og hélt síðan vel út allan seinni hluta hlaupsins.
Árangurinn staðfestir sterka byrjun hjá Hlyni á árinu, en þann 8. febrúar hljóp hann einnig 10 km götuhlaup á 28:57, sem var persónuleg bæting.
Næsta stóra markmið hjá Hlyni er Hannover maraþonið 12. apríl, þar sem hann ætlar sér að ráðast að Íslandsmeti sínu í maraþoni og jafnframt reyna að tryggja sér sæti á Evrópumeistaramótinu í Birmingham í ágúst.
Andrea Kolbeinsdóttir sigraði og setti brautarmet í Ástralíu
Í utanvegahlaupunum vakti Andrea Kolbeinsdóttir ekki síður athygli þegar hún sigraði í móti í Golden Trail World Series í Ástralíu. Þar bætti hún brautarmetið í rúmlega 20 kílómetra hlaupi um meira en tíu mínútur og tryggði sér um leið gylltan farseðil á úrslitamótið í Suður-Kóreu.
Andrea hefur verið búsett í Ástralíu í vetur og virðist vera komin á gott skrið á ný eftir erfitt tímabil. Sérstaklega athyglisvert var að hún lýsti því að hún hefði fundið gleðina aftur í keppninni, sem segir oft jafn mikið og tíminn sjálfur.
Þrjár UFA-konur undir þremur tímum í Sevilla
Eitt af eftirminnilegustu afrekum febrúarmánaðar kom í Sevilla maraþoninu 15. febrúar, þar sem þrjár UFA-konur hlupu allar undir þremur klukkustundum.
Sigþóra Brynja Kristjánsdóttir var fyrst þeirra í mark á 2:51:25, Anna Berglind Pálmadóttir hljóp á 2:51:42 og Rannveig Oddsdóttir á 2:53:23.
Afrekið er sérlega merkilegt í ljósi þess að aðeins níu íslenskar konur hafa frá upphafi hlaupið maraþon undir þremur klukkustundum. Með þessum árangri fóru Sigþóra og Anna Berglind upp í fjórða og fimmta sæti á lista yfir bestu maraþontíma íslenskra kvenna frá upphafi, en tími Rannveigar er jafnframt meðal þeirra bestu í sögunni.
Auk þess féllu aldursflokkamet. Anna Berglind bætti eigið Íslandsmet í flokki 45–49 ára, og Rannveig setti nýtt Íslandsmet í flokki 50–54 ára með glæsilegum hætti.
Samkvæmt þeim gekk hlaupið taktískt nánast fullkomlega upp. Sigþóra og Anna Berglind hlupu saman góðan hluta leiðarinnar og gættu þess að opna ekki of geyst, á meðan Rannveig sýndi mikinn styrk þegar leið á hlaupið. Þær nefna einnig að það sé mikill styrkur fólginn í því að æfa saman, deila reynslu og geta speglað sig hver í annarri, bæði í æfingum og hvíld.
Elísa Kristinsdóttir með sigur og brautarmet á Chianti Ultra Trail
Elísa Kristinsdóttir átti stórkostlega helgi á Chianti Ultra Trail á Ítalíu þann 21. mars, þar sem hún sigraði kvennaflokk í 75 km hlaupi með 3100 metra hækkun á tímanum 6:22:31.
Sigurinn var afar afgerandi, en Elísa kom í mark rúmum níu mínútum á undan næsta keppanda. Þá bætti hún jafnframt brautarmetið um 40 mínútur, sem undirstrikar enn frekar hversu öflug frammistaða hennar var.
Elísa hafnaði í 18. sæti í heildina, var fyrst kvenna í mark og sigraði sinn aldursflokk einnig örugglega.
Landslið Íslands í utanvegahlaupum valið
Í mars var einnig gengið frá vali á íslenska landsliðinu í utanvegahlaupum sem keppir á Evrópumeistaramótinu í Kamnik í Slóveníu 6. júní 2026. Þar verður hlaupin 53 km leið með 2600 metra samanlagðri hækkun.
Eftirtaldir hlauparar skipa íslenska liðið:
Karlar:
- Þorsteinn Roy Jóhannsson (UMFÖ)
- Þorbergur Ingi Jónsson (UFA)
- Sigurjón Ernir Sturluson (FH)
- Stefán Pálsson (Ármann)
Konur:
- Andrea Kolbeinsdóttir (ÍR)
- Elísa Kristinsdóttir (UFA)
- Íris Anna Skúladóttir (FH)
- Anna Berglind Pálmadóttir (UFA)
Það er því ljóst að Ísland verður með sterkt lið til leiks í Slóveníu, þar sem brautin gæti hentað okkar fólki vel.
Arnar Pétursson byrjar árið vel í 100km
Arnar Pétursson náði einnig frábærum árangri á dögunum þegar hann stórbætti eigið Íslandsmet í 100 km hlaupi á móti í Koper í Slóveníu. Hann kom í mark á 6:24:53 klst., sem er bæting um rúmar 20 mínútur frá fyrra Íslandsmeti hans, 6:45:16 klst.
Tími Arnars er jafnframt næsthraðasti tími heims í greininni á árinu og staðfestir að hann er kominn í fremstu röð í 100 km götuhlaupi á alþjóðavísu.
Að sögn Arnars skipti næringin sköpum í hlaupinu, en hann tók inn orku á 12–15 mínútna fresti í gegnum allt hlaupið og þurfti jafnframt að huga sérstaklega að vökvun og steinefnum í sól og hita. Undirbúningurinn fyrir 100 km hlaup er einnig annars eðlis en fyrir styttri vegalengdir, þar sem bæði æfingamagn og styrktarþjálfun skipta miklu máli.
Arnar hefur jafnframt sagt að hann muni leggja upp úr því að mæta á sem flest Íslandsmót í aðdraganda komandi verkefna. Sjá nánar í viðtali við Arnar hér.
Dagskrá FRÍ vottaðra hlaupa
Þótt aðeins sé komið fram á vor er þegar orðið ljóst að 2026 gæti orðið mjög gott ár í íslenskum langhlaupum. Sumarið nálgast hratt og með því koma fjölmörg spennandi verkefni, bæði á götum og utanvegar. Hér fyrir neðan má sjá hlaup sem hafa hlotið FRÍ-vottun og jafnframt teljast meistaramót í viðkomandi grein. Búast má við að fleiri hlaup bætist við listann þegar líður á árið.
| Dagsetning | Hlaup |
|---|---|
| 23. apríl 2026 | Víðavangshlaup ÍR (MÍ í 5 km hlaupi) |
| 28. apríl 2026 | Vecct mílan (MÍ í götumílu) |
| 2. júlí 2026 | Akureyrarhlaupið (MÍ í hálfmaraþoni) |
| 8. júlí 2026 | Aukakrónuhlaup Ármanns (MÍ í 10 km hlaupi) |
| 7. ágúst 2026 | Rauðavatn Ultra (MÍ í 100km hlaupi) |
| 10. október 2026 | Haustmaraþon félags maraþonhlaupara (MÍ í maraþoni) |
Sjá hér lista yfir FRÍ-vottuð hlaup og hlaup í ferli.
Það er því ljóst að mikið er fram undan í íslenskum langhlaupum. Byrjun ársins hefur sýnt að íslenskt langhlaupafólk er í góðu formi og næstu vikur gefa hlaupurum víða um land tækifæri til að taka þátt í vottuðum hlaupum, elta góðan tíma og í sumum tilvikum keppa um Íslandsmeistaratitla.