Í dag er Gunnar Páll Jóakimsson hlaupaþjálfari og fyrrverandi kennari sjötugur. Hann á farsælan hlaupaferil að baki sem og stórkostlegan feril sem hlaupaþjálfari. Gunnar Páll keppti fyrir landsliðið í rúman áratug í 400m – 5000m hlaupum og varð margfaldur Íslandsmeistari. Hann byrjaði að æfa frjálsar íþróttir þegar hann bjó á Árskógsströnd ásamt fjölskyldu sinni en þar var mikið íþróttastarf sem hann tók virkan þátt í. Á menntaskólaárunum fór hann að æfa hlaup hjá ÍR en þar kynntist hann konu sinni, Oddnýju F. Árnadóttur spretthlaupara ásamt því að mynda þar mikilvæg vinatengsl.
Á tímabili þjálfaði hann stóran hluta landsliðsfólks í millivegalengda- og langhlaupum, þar af þrjá Ólympíufara:
- Mörthu Ernstdóttur sem keppti í maraþonhlaupi í Sydney árið 2000
- Kára Stein Karlsson sem keppti í maraþonhlaupi í London árið 2012
- Anítu Hinriksdóttur sem keppti í 800m hlaupi í Ríó árið 2016
Auk þess var Gunnar Páll þjálfari á Evrópumeistara- og heimsmeistaramótum og í öðrum landsliðsverkefnum.
Gunnar Páll er heiðursfélagi ÍR frá árinu 2017 en hann hefur starfað fyrir ÍR í rúmlega hálfa öld. Hann var formaður frjálsíþróttadeildarinnar, hefur tvisvar verið í aðalstjórn félagsins, þjálfari og sjálfboðaliði.Einnig hefur hann starfað fyrir FRÍ en árið 1984 réð FRÍ Gunnar Pál sem fyrsta framkvæmdastjóra Reykjavíkurmaraþonsins. Hann hefur unnið hin ýmsu nefndarstörf fyrir FRÍ en á síðari árum hefur hann unnið að söguvef FRÍ með öðrum góðum félögum. Frjálsíþróttasamband Íslands óskar Gunnari Páli til hamingju með árin 70 og þakkar honum fyrir ómetanlegt framlag til íþróttarinnar.