FH stóð uppi sem bikarmeistari þegar Bikarkeppni FRÍ fór fram í Kaplakrika laugardaginn 8. mars. Félagið átti afar sterkan keppnisdag og tryggði sér sigur í karla-, kvenna- og heildarkeppni. FH hlaut 72 stig í karlakeppni, 73 stig í kvennakeppni og samtals 155 stig í heildarkeppninni.
Í karlaflokki varð ÍR í öðru sæti með 60 stig og Ármann í þriðja sæti með 47 stig. Í kvennaflokki varð ÍR einnig í öðru sæti með 61 stig, en Fjölnir og HSK deildu þriðja sæti með 52 stig hvort félag. Í heildarkeppninni fylgdi ÍR fast á eftir FH með 130 stigum, en HSK hafnaði í þriðja sæti með 102 stig.
Sterk breidd skilaði FH sigri í kvennaflokki
Í langstökki kvenna sigraði Birna Kristín Kristjánsdóttir örugglega með 6,16 m. Helga Þóra Sigurjónsdóttir bar sigur úr býtum í hástökki kvenna með 1,71 m, og í stangarstökki kvenna sigraði Hanna María Petersdóttir með 3,40 m. Þar var Ísold Sævarsdóttir skammt undan með glæsilega bætingu og stökk upp á 3,20 m.
Í 60 m grindahlaupi kvenna átti María Rún Gunnlaugsdóttir frábært hlaup og sigraði á 8,63 sek. á undan Ísoldi Sævarsdóttur sem kom í mark á 8,74 sek. Í 60 m hlaupi kvenna sigraði Christina Alba Marcus Hafliðadóttir á 7,56 sek., en Eir Chang Hlésdóttir varð önnur á 7,59 sek. í sterku hlaupi.
Í kúluvarpi kvenna sigraði Erna Sóley Gunnarsdóttir örugglega og Hera Christensen varð önnur með gott kast upp á 13,68 m. Í 1500 m hlaupi kvenna sýndi FH mikinn styrk þegar Íris Dóra Snorradóttir og Íris Anna Skúladóttir komu fyrst og önnur í mark á rúmum 4:42 mínútum. Í 400 m hlaupi kvenna sigraði Ísold Sævarsdóttir á 55,58 sek. og Eyrún Svala Gústavsdóttir varð önnur á 56,88 sek. Í þrístökki kvenna sigraði Irma Gunnarsdóttir með 13,10 m, en Anna Metta Óskarsdóttir hafnaði í öðru sæti með 11,39 m.
FH sterkt í karlakeppninni
Í karlaflokki var einnig boðið upp á marga spennandi keppnisgreinar. Í 60 m hlaupi karla sigraði Kolbeinn Höður Gunnarsson á 7,02 sek., aðeins á undan Arnari Loga Brynjarssyni sem hljóp á 7,03 sek. Í 60 m grindarhlaupi karla varð spennandi keppni þar sem Ívar Kristinn Jasonarson hafði betur á 8,57 sek. á undan Ívari Yli Birkissyni. Í langstökki karla var mjótt á munum þegar Gylfi Ingvar Gylfason sigraði með 6,78 m, aðeins tveimur sentímetrum lengra en Tobías Þórarinn Matharel sem stökk 6,76 m. Gylfi, sem hefur glímt við meiðsli í vetur, sagði í viðtali við FRÍ að hann stefndi á að fara yfir sjö metrana.
Í 1500 m hlaupi karla átti Fjölnir Brynjarsson sigurhlaup og Stefán Pálsson tryggði sér annað sætið eftir skynsamlegt og vel útfært hlaup. Í hástökki karla sigraði Gunnar Eyjólfsson með 1,90 m og bætti þar með sinn persónulega árangur. Helgi Reynisson varð annar. Í þrístökki karla sigraði Guðjón Dunbar Diaquoi með 14,44 m, og Gylfi Ingvar Gylfason varð annar.
Mikil spenna skapaðist í 400 m hlaupi karla. Leó Örn Þórarinsson náði þar sigri á persónulegri bætingu, 49,50 sek. Óhapp varð á leið inn í þriðju beygju þegar Ívar Kristinn Jasonarson og Kjartan Óli Bjarnason rákust saman, sem hafði áhrif á gang hlaupsins. Leó Örn nýtti sér það vel, en Patrekur Ómar Haraldsson átti einnig mjög gott hlaup í fyrri riðli og kom í mark á persónulegri bætingu, 49,62 sek., sem skilaði honum annað sæti. Kjartan Óli Bjarnason varð svo þriðji á 49,76 sek
Þótt staðan í stigakeppninni væri farin að skýrast fyrir lokagreinar dagsins var hvergi slakað á í 4×200 m boðhlaupunum. Í kvennaboðhlaupinu sigraði ÍR með öruggum hætti, Fjölnir varð í öðru sæti og FH í þriðja. Í karlaboðhlaupinu hafði ÍR einnig betur, FH hafnaði í öðru sæti og UFA í því þriðja. FH hafði þó þegar byggt sér upp nægilegt forskot til að tryggja sér bikarmeistaratitilinn.
Lokastaðan
Heildarkeppni
FH – 155 stig.
ÍR – 130 stig.
HSK – 102 stig.
Karlakeppni
FH – 72 stig.
ÍR – 60 stig.
Ármann – 47 stig.
Kvennakeppni
FH – 73 stig.
ÍR – 61 stig.
Fjölnir – 52 stig.
HSK – 52 stig.
Góður keppnisdagur er því að baki í Kaplakrika þar sem margir af fremstu frjálsíþróttamönnum landsins tókust á og stigakeppnin hélt spennu langt fram eftir degi. FH stóð uppi sem verðskuldaður bikarmeistari eftir breidd, styrk og jafna frammistöðu í öllum flokkum.
Bikarkeppni FRÍ 15 ára og yngri
Bikarhelgin hélt áfram í Kaplakrika sunnudaginn 9. mars þegar Bikarkeppni FRÍ 15 ára og yngri fór fram. Þar var hart barist allan daginn, mikið um góðan árangur og fjöldi keppenda bætti sig í sinni grein. Keppnin var lengi vel jöfn og skemmtileg, en þegar leið á daginn fór ÍR að sækja í sig veðrið og náði að byggja upp forskot sem dugði til sigurs í heildarkeppninni.
ÍR stóð að lokum uppi sem sigurvegari með 107 stig. Ármann hafnaði í öðru sæti með 88 stig, Breiðablik varð í þriðja sæti með 86 stig og FH í því fjórða með 78,5 stig. Það var því mjótt á munum á milli efstu félaga og ljóst að mikil barátta var um hvert stig frá upphafi til enda.
Í piltaflokki var það einnig ÍR sem hafði betur með 60 stig, eftir sterka og jafna frammistöðu yfir daginn. Ármann varð þar í öðru sæti með 51 stig, FH í þriðja með 38,5 stig og HHF og Breiðablik komu næst með 34 stig hvort félag.
Í stúlknaflokki var það hins vegar Breiðablik sem stóð efst með 52 stig. ÍR fylgdi fast á eftir með 47 stig, FH varð í þriðja sæti með 40 stig og UFA í því fjórða með 39 stig. Þar var einnig mikil samkeppni og mörg félög sem létu vel að sér kveða.
Dagurinn einkenndist af kraftmikilli keppni, góðum liðsanda og fjölmörgum sterkum frammistöðum hjá ungu keppendunum. Það lofar góðu fyrir framtíðina að sjá hversu mikil breidd og barátta var í keppninni, auk þess sem mörg ungmenni nýttu tækifærið til að sýna framfarir og bæta árangur sinn.
Lokastaðan var því eftirfarandi:
Heildarkeppni
ÍR – 107 stig.
Ármann – 88 stig.
Breiðablik – 86 stig.
FH – 78,5 stig.
HSK/Selfoss – 61,5 stig.
UFA – 53 stig.
Fjölnir – 49 stig.
HHF – 48 stig.
Piltar
ÍR – 60 stig.
Ármann – 51 stig.
FH – 38,5 stig.
HHF – 34 stig.
Breiðablik – 34 stig.
HSK/Selfoss – 31,5 stig.
Fjölnir – 22 stig.
UFA – 14 stig.
Stúlkur
Breiðablik – 52 stig.
ÍR – 47 stig.
FH – 40 stig.
UFA – 39 stig.
Ármann – 37 stig.
HSK/Selfoss – 30 stig.
Fjölnir – 27 stig.
HHF – 14 stig.