Ólympíuhátíð Evrópuæskunnar (EYOF) var sett í gær, sunnudaginn 20. júlí, en hún fer fram dagana 20.-26. júlí í Skopje í Makedóníu. Frjálsíþróttakeppnin hófst í morgun og var Patrekur Ómar Haraldsson fyrstur íslensku keppendanna út á völlinn en hann keppti í undanriðlum 800 m hlaups pilta í morgun. Patrekur var í 2. riðli og endaði þar í 7. sæti á tímanum 2:01,76 mín, sem er persónuleg bæting utanhúss um eina og hálfa sekúndu en hans besti tími utanhúss var 2:03,18 mín frá því um miðjan maí sl. Patrekur hafnaði í 21. sæti í heildina og komst því ekki áfram í úrslit að þessu sinni. En flott bæting hjá Patreki Ómari sem var að keppa í sinni fyrstu alþjóðlegu keppni fyrir hönd Íslands.
Seinni partinn í dag fór keppni í kúluvarpi pilta fram og þar var Benedikt Gunnar Jónsson meðal keppenda. Benedikt hefur verið á svakalegu flugi í kúluvarpinu undanfarið og hefur bætt hvert aldursflokkametið á fætur öðru, bæði innanhúss og utanhúss og með ýmsum þyngdum. Í dag varpaði Benedikt kúlunni 17,48 og endaði í 9. sæti og var aðeins einu sæti frá því að komast í átta manna úrslit. Ekki amaleg frumraun hjá honum á alþjóðlega keppnissviðinu.
Næstur íslensku keppendanna út á völlinn er Hjálmar Vilhelm Rúnarsson en hann keppir í tugþraut og fyrsta grein hennar, 100 m hlaup, er föstudaginn 25. júlí klukkan 9:00. Seinnipart föstudags keppir svo Bryndís Embla Einarsdóttir í spjótkasti stúlkna en sú keppni hefst klukkan 16:30.
Minnum á að hægt er að fylgjast með gangi mála á eftirfarandi miðlum:
Hægt verður að fylgjast með gangi mála í gegnum eftirfarandi miðlum:
📱 Facebook: Skopje2025
📸 Instagram: @skopje_2025
🎵 TikTok: @skopje2025
▶️ Streymi