Virkilega skemmtilegur dagur í Laugardalshöllinni í dag þar sem fyrri dagur Meistaramóts Íslands innanhúss 2026 fór fram.
Í dag var keppt til úrslita í 11 greinum og náðist flottur árangur í mörgum þeirra. Sett var eitt mótsmet og fjölmargar persónulegar bætingar.
Heildarúrslit dagsins má sjá hér.
60m Hlaup
Í kvennaflokki sigraði Christina Alba Marcus Hafliðadóttir á frábæru nýju mótsmeti, 7,42 sek. Eir Chang Hlésdóttirvarð önnur á 7,49 sek og Lena Rún Aronsdóttir þriðja á 7,75 sek. Tvær persónulegar bætingar voru í hlaupinu. Við erum með ótrúlega sterka spretthlaupara, þar sem Eir er einnig nýlega búin að setja Íslandsmet í 200m hlaupi og mun hlaupa það á morgun.
Alba var tekin í viðtal eftir mótið af RÚV, þar sem fram kom að Íslandsmetið hafi ekki verið markmið í upphafi tímabils, en miðað við gengi vetrarins sé stefnan nú sett á það. Það verður spennandi að fylgjast með Bikarkeppni FRÍ næstu helgi.
Íslandsmeistari: Christina Alba Marcus Hafliðadóttir (Fjölnir) – 7,42sek (mótsmet)
2. sæti: Eir Chang Hlésdóttir (ÍR) – 7,49sek
3. sæti: Lena Rún Aronsdóttir (FH) – 7,75sek
Í karlaflokki sigraði Daníel Ingi Egilsson á 6,85 sek, sem er nærri hans besta árangri í vetur (6,83 sek). Í öðru sæti var Kristófer Þorgrímsson á 6,93 sek og Gabríel Glói Freysson varð þriðji á 7,15 sek. Flottir tímar hjá strákunum og gaman að sjá þá hlaupa reglulega nær og í kringum 7 sek.
Íslandsmeistari: Daníel Ingi Egilsson (FH) – 6,85sek
2. sæti: Kristófer Þorgrímsson (FH) 6,93sek
3. sæti: Gabríel Glói Freysson (UFA) – 7,15sek
Hástökk
Helga Þóra Sigurjónsdóttir sigraði hástökk kvenna með stökk upp á 1,71 m. María Rún Gunnlaugsdóttir varð önnur með 1,68 m og Bryndís Lára Guðjónsdóttir þriðja með 1,60 m. Katrín Tinna Pétursdóttir stökk einnig 1,60 m, en Bryndís hafði færri tilraunir og tryggði sér því bronsið.
Íslandsmeistari: Helga Þóra Sigurjónsdóttir (FH) – 1,71m
2. sæti: María Rún Gunnlaugsdóttir (ÍR) – 1,68m
3. sæti: Bryndís Lára Guðjónsdóttir (Breiðablik) – 1,60m
Stangarstökk
Í stangarstökki karla sigraði Grétar Björn Unnsteinsson (Fjölnir) með frábæru stökki upp á 4,71 m, sem er persónuleg bæting (átti 4,61 m fyrir keppni). Grétar átti einnig góðar tilraunir á næstu hæð og verður spennandi að fylgjast með honum á næstunni. Úlfar Jökull Eyjólfsson varð annar með 4,53 m og Karl Sören Theodórsson þriðji með 4,43 m, einnig persónuleg bæting.
Íslandsmeistari: Grétar Björn Unnsteinsson (Fjölni) – 4,71m (PB)
2. sæti: Úlfar Jökull Eyjólfsson (Ármann) – 4,53m
3. sæti: Karl Sören Theódórsson (Ármann) – 4,43m (PB)
Langstökk
langstökki karla sigraði Tobías Þórarinn Matharel með stökk upp á 6,85 m. Jacques R. S. Borges Schmitt varð annar og Dagur Pálmi Ingólfsson þriðji. Ungir og efnilegir keppendur sem verður gaman að fylgjast með.
Íslandsmeistari: Tobías Þórarinn Matharel (UFA) – 6,85m
2. sæti: Jacques R. S. Borges Schmitt (Breiðablik) – 6,66m (PB)
3. sæti: Dagur Pálmi Ingólfsson (UFA) – 6,07m (PB)
Í langstökki kvenna sigraði Birna Kristín Kristjánsdóttir með frábæru stökki upp á 6,38 m. María Rún Gunnlaugsdóttir náði öðru sætinu í síðustu tilraun með 5,73 m, aðeins einum sentímetra lengra en Ísold Sævarsdóttir í þriðja sæti með 5,72 m. María og Ísold mætast einnig í grindahlaupinu á morgun en það er oft mikil keppni og lítill munur milli þeirra.
Íslandsmeistari: Birna Kristín Kristjánsdóttir (Breiðablik) – 6,38m
2. sæti: María Rún Gunnlaugsdóttir (ÍR) – 5,73m
3. sæti: Ísold Sævarsdóttir (FH) – 5,72m
1500m hlaup
Í 1500 m hlaupi karla sigraði Fjölnir Brynjarsson með frábærum lokaspretti og kom fyrstur í mark á 4:01,63. Hilmar Ingi Bernharðsson varð annar á 4:01,76 og Daníel Snær Eyþórsson þriðji á 4:08,34.
Íslandsmeistari: Fjölnir Brynjarsson (FH) – 4:01,63 (PB)
2. sæti: Hilmar Ingi Bernharðsson (ÍR) – 4:01,76 (PB)
3. sæti: Daníel Snær Eyþórsson (FH) – 4:08,34
Í 1500 m hlaupi kvenna sigraði Aníta Hinriksdóttir á 4:28,29 eftir að hafa stjórnað hlaupinu frá upphafi. Íris Anna Skúladóttir varð önnur á 4:41,49 og Katla Rut Róbertsdóttir Kluvers þriðja á 5:03,09, þar sem hún náði flottum lokaspretti og setti PB. Þá setti Fríða Rún einnig frábært aldursflokkamet í flokki 55–59 ára.
Íslandsmeistari: Aníta Hinriksdóttir (FH) – 4:28,29
2. sæti: Íris Anna Skúladóttir (FH) – 4:41,49
3. sæti: Katla Rut Róbertsdóttir Kluvers (FH) – 5:03,09 (PB)
Kúluvarp
Guðni Valur Guðnason mætti til landsins og sigraði kúluvarp karla með kasti upp á 17,79 m. Benedikt Gunnar Jónsson varð annar á 14,27 m (PB) og Valdimar Hjalti Erlendsson þriðji á 13,11 m. Guðni Valur var einnig tekinn í viðtal af RÚV eftir mót og lýsti góðu standi og spennandi tímabili fram undan í sumar.
Íslandsmeistari: Guðni Valur Guðnason (ÍR) – 17,79
2. sæti: Benedikt Gunnar Jónsson (ÍR) – 14,27 (PB)
3. sæti: Valdimar Hjalti Erlendsson (FH) – 13,11
400m Hlaup
Í 400m hlaupi sigraði Guðbjörg Jóna Bjarnardóttir á tímanum 56,38 sek, Eyrun svala Gústavsdóttir á 58,04 sek og Vilhelmína Þór Óskarsdóttir í því þriðja á 59,01 sek. Þær byrjuðu hlaupið allar mjög vel og var góð barátta eftir fyrsta hring, en þar jók Guðbjörg forystuna áður en hún hleypur síðan fyrst í mark.
Íslandsmeistari: Guðbjörg Jóna Bjarnadóttir (ÍR) – 56,38sek
2. sæti: Eyrún Svala Gústaavsdóttir (Breiðablik) – 58,04sek
3. sæti: Vilhelmína Þór Óskarsdóttir (Fjölnir) – 59,01sek
Í 400 m hlaupi karla sigraði Kjartan Óli Bjarnason á frábærum tíma, 49,19 sek, og bætti sig í leiðinni. Baráttan um silfur og brons var ótrúlega jöfn, munurinn var aðeins einn þúsundasti úr sekúndu. Ívar Kristinn Jasonarson varð annar á 49,88 sek og Leó Örn Þórarinsson þriðji, einnig á 49,88 sek.
Íslandsmeistari: Kjartan Óli Bjarnason (Fjölnir) – 49,19sek (PB)
2. sæti: Ívar Kristinn Jasonarson (ÍR) – 49,88sek (.872)
3. sæti: Leó Örn Þórarinsson (FH) – 49,88sek (.873) (PB)
Samantekt
Við óskum öllum til hamingju með árangurinn í dag. Frábær fyrri dagur að baki, við bíðum spennt eftir seinni deginum á morgun og hvetjum fólk til að mæta í höllina og fylgjast með baráttunni um Íslandsmeistaratitlana.