Það var nóg um að vera hjá íslensku frjálsíþróttafólki í vikunni, bæði heima og erlendis. Þar bar hæst glæsilegan árangur íslenska hópsins á Evrópubikarkastmótinu í Nicosia, þar sem tvö Íslandsmet féllu og tvö verðlaunasæti unnust, auk þess sem Patrekur Ómar Haraldsson bætti Íslandsmet sitt í 600 metra hlaupi pilta 16–17 ára á Bónusmóti FH. Þá náðu fjölmargir Íslendingar góðum úrslitum á mótum víða um heim.
Tvö Íslandsmet og tvö verðlaunasæti á Evrópubikarkastmótinu
Íslenski hópurinn átti afar sterkt mót á Evrópubikarkastmótinu í Nicosia á Kýpur um helgina. Þar féllu tvö Íslandsmet þegar Hilmar Örn Jónsson og Guðrún Karítas Hallgrímsdóttir bættu bæði eigið met í sleggjukasti og enduðu jafnframt bæði í 3. sæti í sinni keppni.
Hilmar kastaði sleggjunni 78,03 metra, bætti eigið Íslandsmet frá árinu 2020 og tryggði sér um leið EM-sæti í Birmingham í sumar, þar sem lágmarkið er 77,00 metrar. Guðrún Karítas kastaði 71,41 metra, bætti eigið Íslandsmet um þrjá sentímetra og er nú aðeins níu sentímetrum frá EM-lágmarki.
Hilmar var ánægður með niðurstöðuna eftir mót og sagði æfingarnar hafa bent skýrt til þess að formið væri til staðar. Þá lagði hann áherslu á að mikilvægt væri að hafa nú þegar tryggt sér þátttöku á Evrópumótinu og geta því einbeitt sér að undirbúningi frekar en að eltast við sæti á styrkleikalista.
Guðrún Karítas sagði einnig að árangurinn væri mikil hvatning inn í sumarið. Hún var mjög sátt við byrjun tímabilsins og taldi jafnframt að enn væri meira inni. Íslandsmetið styrkir stöðu hennar enn frekar á leiðinni til Birmingham.
Auk þeirra skiluðu aðrir íslenskir keppendur einnig góðum árangri á mótinu. Hera Christensen varð í 6. sæti í kringlukasti U23 með 50,68 metra, Erna Sóley Gunnarsdóttir hafnaði í 7. sæti í kúluvarpi með 16,50 metra ogGuðni Valur Guðnason kastaði kringlunni 61,15 metra og endaði í 8. sæti.
Patrekur bætti eigið Íslandsmet í 600 metrum
Á Bónusmóti FH um síðustu helgi var keppt í 600 metra hlaupi karla og þar bætti Patrekur Ómar Haraldsson (FH) eigið Íslandsmet í flokki 16–17 ára þegar hann hljóp á 1:22,79 mínútum. Fyrra met hans var 1:23,41 mínútur, sett á Nike móti FH þann 8. janúar síðastliðinn.
Patrekur gekk til liðs við FH um síðustu áramót og hefur tekið miklum framförum á árinu. Hann hefur meðal annars hlaupið 400 metra á 49,62 sekúndum og 800 metra á 1:57,56 mínútum.
Sömuleiðis átti Leó Örn Þórarinsson (FH) sterkt hlaup í sömu grein þegar hann kom í mark á 1:20,96 mínútum, sem skipar honum í 4. sæti á afrekaskrá frá upphafi. Íslandsmetið í greininni er 1:20,26 mínútur og er í eigu Sæmundar Ólafssonar.
Hekla í 10. sæti á NCAA Division II meistaramótinu
Hekla Magnúsdóttir keppti í fimmtarþraut á NCAA Division II Indoor Track & Field Championships í Virginia Beach í Bandaríkjunum dagana 13.–14. mars og hafnaði þar í 10. sæti með 3669 stig.
Hún átti meðal annars mjög sterkt hlaup í 60 metra grind, þar sem hún var fljótust allra í fjölþrautinni á 9,03 sekúndum, og bætti sig einnig í 800 metrunum þegar hún hljóp á 2:30,83. Að auki stökk hún 1,56 m í hástökki, 5,47 m í langstökki og kastaði 12,61 m í kúluvarpi.
María Helga með sigur og persónulegt met í grindahlaupi
María Helga Högnadóttir keppti á Myrtle Beach Collegiate Challenge í Bandaríkjunum dagana 13.–14. mars og stóð sig vel í mörgum greinum.
Í 100 metra grindahlaupi sigraði hún á 14,17 sekúndum, sem er nýtt persónulegt met. Í 100 metra hlaupi hljóp hún á 12,17 sekúndum, og í undanrásum kom hún fyrst í mark á 12,11 sekúndum, þó með of miklum meðvindi. Þá stökk hún einnig 5,23 metra í langstökki.
Brynja Rós á Írlandi
Brynja Rós Brynjarsdóttir keppti á National U20 + U23 Indoor Championships í Athlone á Írlandi 14. mars og tók þátt í þremur greinum. Hún varð í 3. sæti í 60 metra grindahlaupi á 9,30 sekúndum, hafnaði í 4. sæti í hástökki með 1,55 m og varð einnig í 4. sæti í kúluvarpi með 9,80 m, sem er hennar ársbest.
Góð hlaup í Kaupmannahöfn
Á NIKE Spring Run í Kaupmannahöfn 8. mars náðu íslenskir hlauparar einnig góðum árangri.
Í 10 km götuhlaupi karla bætti Thor Gudjonsson sig og hljóp á 35:35. Í hálfmaraþoni karla bættu bæði Jóhann Björn Björnsson og Marteinn Guðmundsson sig þegar þeir hlupu á 1:23:20 og 1:23:36. Egill Bjarni Gíslason hljóp á 1:24:40 og Árni Páll Árnason bætti sig í 1:24:51. Í 10 km götuhlaupi kvenna hljóp Rannveig Oddsdóttir sitt ársbesta, 39:30, og hafnaði í 6. sæti.