Íslenskt frjálsíþróttafólk lét vel að sér kveða erlendis undanfarna daga. Á Evrópumeistaramóti masters í Torun í Póllandi féllu Íslandsmet, á meðan keppendur í Bandaríkjunum og í Evrópu náðu einnig góðum árangri, þar á meðal sigrum, persónulegum metum og besta árangri á tímabilinu.
Íslenskir keppendur standa sig vel á EM Masters í Torun
Evrópumeistaramót masters í frjálsíþróttum fór fram í Torun í Póllandi og náðu íslenskir keppendur þar góðum árangri, auk þess sem Íslandsmet féllu.
Fríða Rún Þórðardóttir átti afar sterkt mót í W55 flokki. Hún varð jöfn í 3. sæti í 3000 metra hlaupi á tímanum 11:04,47 mín. og setti um leið nýtt Íslandsmet í flokknum.
Á sunnudeginum 29. mars keppti Fríða Rún síðan í 5 km götuhlaupi, þar sem hún hafnaði í 8. sæti á tímanum 20:40 mín.Hún hafði þá glímt við matareitrun á leiðinni til Torun og náði því ekki að sýna sitt besta í hlaupinu.
Fríða Rún svaraði hins vegar vel fyrir sig síðar á mótinu og átti mjög sterka frammistöðu í 8 km víðavangshlaupi, þar sem hún hafnaði í 2. sæti af 14 keppendum á tímanum 34:55 mín.
Hún lauk síðan keppni á mótinu í 1500 metra hlaupi þann 2. apríl, sem var aukagrein daginn eftir víðavangshlaupið. Þar hafnaði hún í 8. sæti af 22 keppendum á tímanum 5:30,41 mín.
Helgi Sigurðsson átti einnig sterkt hlaup í 3000 metrum í M65 flokki, þar sem hann varð í 4. sæti og bætti Íslandsmetið í sínum flokki þegar hann kom í mark á 11:02,25 mín.
Hafsteinn keppti síðan í undanúrslitum í 400 metra hlaupi á laugardagsmorgni. Þar varð hann fjórði í sínum riðli á tímanum 62,70 sek. og var ekki langt frá því að komast áfram í úrslit, en síðasti tími inn í úrslit var 62,51 sek. Hafsteinn hefur þar með lokið keppni á mótinu.
Skúli Guðbjarnarson tók þátt í riðlakeppni 60 metra hlaups á sunnudag og hljóp á 10,20 sek. Hann varð sjöundi í sínum riðli og hefur þar með lokið keppni á mótinu.
Þann 31. mars keppti Hrönn Guðmundsdóttir til úrslita í 800 metra hlaupi í W60 flokki. Hún hafnaði þar í 4. sæti eftir harða baráttu um sætið og hljóp á 2:38,39 mín. Tvær fyrstu konurnar í hlaupinu fóru undir 2:30 mínútur.
Elísabet Rut og Arndís Diljá með sigra í Bandaríkjunum
Elísabet Rut Rúnarsdóttir hélt áfram að sýna styrk sinn í sleggjukasti vestanhafs. Hún sigraði á Bobcat Invitational í San Marcos í Texas með kasti upp á 68,46 metra dagana 2.–4. apríl. Þar áður hafnaði hún í 3. sæti á 98th Clyde Littlefield Texas Relays í Austin með kast upp á 69,89 metra.
Arndís Diljá Óskarsdóttir sigraði í spjótkasti á Pepsi Florida Relays í Gainesville í Flórída dagana 3.–4. apríl með kast upp á 54,48 metra.
Á sama móti hafnaði Eva María Baldursdóttir í 6. sæti í hástökki með stökk upp á 1,76 metra í invitational-keppni.
Ingibjörg fyrst í mark og Egill fjölhæfur í Pennsylvaníu
Ingibjörg Sigurðardóttir sigraði í 800 metra hlaupi á UConn Dog Fight í Storrs í Connecticut 4. apríl, þar sem hún hljóp á 2:22,67 mín., sem er hennar besti árangur á tímabilinu.
Egill Atlason Waagfjörð keppti í mörgum greinum á All-American mótinu í East Stroudsburg í Pennsylvaníu 4. apríl. Hann hljóp 100 metra á 11,72 sek. og 200 metra á 23,76 sek., sem var besti árangur hans á tímabilinu í báðum greinum. Þá stökk hann 6,37 metra í langstökki, 12,29 metra í þrístökki og kastaði spjótinu 40,86 metra.
Sigursteinn og Sara Kristín í góðu stuði á Vertklasse
Á Vertklasse mótinu í High Point í Norður-Karólínu dagana 2.–3. apríl hafnaði Sigursteinn Ásgeirsson í 6. sæti í kúluvarpi með kast upp á 16,75 metra, sem er hans besti árangur á tímabilinu. Hann keppti einnig í kringlukasti og kastaði þar 42,15 metra.
Sara Kristín Lýðsdóttir átti gott mót og hafnaði í 2. sæti í 100 metra grindahlaupi á 15,44 sek., sem er besti árangur hennar á tímabilinu. Hún stökk einnig 1,52 metra í hástökki og 5,50 metra í langstökki, þar sem hún setti persónulegt met.
Sterk þátttaka í hálfmaraþonum í Berlín og Prag
Íslenskir hlauparar voru áberandi á götum Evrópu um helgina, bæði í Generali Berliner Halbmarathon þann 29. mars og Generali Prague Half Marathon þann 28. mars.
Í Berlín náði Viktor Orri Pétursson sterkum árangri í hálfmaraþoni karla þegar hann hljóp á 1:09:41 klst., sem er persónulegt met. Einnig bættu fjölmargir Íslendingar sig, þar á meðal Ólafur Steinar Gestsson, Helgi Jónsson, Óskar Arnason, Friðjón Daníelsson og fleiri.
Í kvennaflokki í Berlín náðu margar íslenskar hlaupakonur góðum árangri. Sara Rut Beck hljóp á 1:43:42 klst., sem er besti árangur hennar á tímabilinu, og meðal þeirra sem settu persónulegt met voru meðal annars Julia Werner, Auður Vésteinsdóttir, Anna Thorbjörg Jónasdóttir, Ólöf Margrétardóttir, Annamaría Þorsteinsdóttir og Jófríður Hilmarsdóttir.
Í Prag var einnig sterk íslensk þátttaka og féllu fjölmörg persónuleg met. Í karlaflokki bættu sig meðal annars Jón Jónsson, Elías Gunnar Þorbjörnsson, Bjarni Ólafur Guðmundsson, Sigurður Benediktsson, Grétar Torisson, Steinar Logi Líndal Jónatansson og fleiri.
Í kvennaflokki í Prag settu fjölmargar íslenskar konur persónuleg met, þar á meðal Gerður Guðlaugsdóttir, sem hljóp á 1:37:18 klst., auk Halldóru Smáradóttur, Vigdísar Sigurðardóttur, Önnu Ýrar Bodvarsdóttur, Jódísar Brynjarsdóttur, Thelmu Gunnarsdóttur, Lovísu Stefánsdóttur, Söndru Sif Gunnarsdóttur og margra fleiri.
Sendið inn efni
Eigið þið myndir, úrslit eða fréttir sem eiga heima í vikuyfirlitinu? Sendið á kormakur@fri.is