Íslenski hópurinn átti sterkt mót á Evrópubikarkastmótinu um helgina. Tvö Íslandsmet litu dagsins ljós og íslenskir keppendur náðu góðum árangri í mörgum greinum. Þar stóðu hæst Hilmar Örn Jónsson og Guðrún Karítas Hallgrímsdóttir, sem bættu bæði eigið Íslandsmet í sleggjukasti og höfnuðu í 3. sæti í sinni keppni.
Hilmar kastaði sleggjunni 78,03 metra, bætti eigið Íslandsmet frá árinu 2020 og tryggði sér um leið sæti á EM í Birmingham í sumar, þar sem lágmarkið er 77 metrar. Guðrún Karítas kastaði 71,41 metra, bætti eigið Íslandsmet um þrjá sentímetra og er nú aðeins 9 sentímetrum frá EM-lágmarki.
Hilmar Örn Jónsson tryggði sér miða á EM og setti Íslandsmet
„Mótið var gott, alltaf gaman að keppa á ETC. Fengum á okkur smá rok og rigningu, en það var bara hressandi“ sagði Hilmar eftir keppni.
Hann sagði að æfingar að undanförnu hefðu gefið skýra vísbendingu um að formið væri til staðar.
„Það var búið að ganga mjög vel á æfingum undanfarið þannig að ég vissi alveg að formið væri til staðar. Mjög ánægður með að hafa tekist að sýna formið.“
Hilmar sagði jafnframt að framkvæmdin í keppninni hafi skipt mestu máli.
„Það var alls ekki þannig að allt hafi smollið saman, en það sem gekk vel var að framkvæma köstin eins og ég og Matti þjálfari höfðum talað um fyrir mót.“
Að hans sögn skiptir miklu máli að hafa nú þegar tryggt sér þátttöku á Evrópumótinu.
„Það er auðvitað mjög mikilvægt fyrir mig að hafa tryggt mig á EM og geta einbeitt mér að undirbúningi fyrir það. Smá tilbreyting frá því að eltast við ranking.“
Næst tekur við stutt hvíld áður en æfingarnar þyngjast aftur. Hilmar reiknar með að hefja keppni á ný í maí.
Guðrún bætti eigið met og komst á pall
Guðrún Karítas Hallgrímsdóttir átti einnig mjög sterka keppni þar sem hún kastaði 71,41 metra, bætti eigið Íslandsmet og hafnaði í 3. sæti.
„Ég er bara mjög sátt. Skemmtilegt að fá að keppa á þessu móti og gaman að ná að byrja tímabilið svona vel,“ sagði Guðrún Karítas.
Hún sagði aðstæður hafa verið aðeins öðruvísi en búast mátti við, en var ánægð með hvernig hún leysti verkefnið.
„Mér leið ágætlega í keppninni. Aðstæðurnar voru aðeins öðruvísi en maður var að búast við fyrir mótið en í heildina er ég ánægð með hvernig ég keppti og mjög gaman að komast á pall líka. Var alls ekki að búast við því en vissi svo sem alveg að það væri möguleiki ef ég næði góðu kasti.“
Aðspurð hvort hún hafi fundið á æfingum að Íslandsmet væri inni sagði hún:
„Já, miðað við æfingar hjá mér vissi ég alveg að ég ætti þetta inni en svo er auðvitað ekkert sjálfsagt að hitta á það á móti.“
Guðrún segir að árangurinn gefi sér mikla hvatningu inn í framhaldið.
„Það er mikil hvatning en mér líður svo sem alveg vel með hvar ég er í ranking núna eftir þetta mót. Auðvitað er samt miklu skemmtilegra að ná beint inn og það er markmiðið en ég hef líka trú á að það muni koma, tímabilið er rétt að byrja.“
Hún telur jafnframt að enn sé meira inni.
„Mér líður mjög vel eftir þetta mót. Þó ég sé mjög sátt með árangurinn fannst mér ég ekki alveg ná að hitta á það eins og ég veit að ég get. Svo nú er bara að fínpússa aðeins svo maður geti neglt vel á það í sumar.“
Á góðri leið til Birmingham
Íslandsmet Guðrúnar styrkir stöðu hennar enn frekar á leiðinni til Birmingham. Eins og staðan er núna situr hún í 17. sæti á Road to Birmingham lista European Athletics í sleggjukasti, en 30 keppendur fá sæti í greininni á EM í sumar. Hægt er að fylgjast með stöðunni á síðunni Road to Birmingham.
Fleiri góð úrslit hjá íslenska hópnum
Auk Íslandsmetanna tveggja skiluðu aðrir íslenskir kastarar einnig góðum árangri á mótinu.
Hera Christensen hafnaði í 6. sæti í kringlukasti U23 með kast upp á 50,68 metra.
Erna Sóley Gunnarsdóttir varð í 7. sæti í kúluvarpi með 16,50 metra.
Guðni Valur Guðnason endaði í 10. sæti í kringlukasti með 61,15 metra.
Með tveimur Íslandsmetum, tveimur verðlaunasætum og fleiri sterkum frammistöðum átti íslenski hópurinn afar gott Evrópubikarkastmót og lofar byrjun tímabils góðu fyrir framhaldið.
Hægt er að nálgast myndir sem Marta María Siljudóttir tók af mótinu:
Dagur 1
Dagur 2