Jón Þ. Ólafsson, fyrrum Íslandsmethafi í hástökki, lést þann 24. janúar síðastliðinn. Útför hans fer fram í dag, 27. mars, í Lindakirkju.
Jón var einn fremsti íþróttamaður þjóðarinnar á sjöunda áratug síðustu aldar en hann keppti alla tíð fyrir ÍR og setti á þriðja tug Íslandsmeta í stökkgreinum. Hann var kjörinn íþróttamaður ársins árið 1963. Jón keppti á tvennum Ólympíuleikum í hástökki, í Tokyo árið 1964 og í Mexíkóborg árið 1968. Hann setti sitt fyrsta Íslandsmet í hástökk árið 1961 og stökk þá 2,01 m. Hann bætti svo metið jafnt og þétt næstu ár og stökk hæst utanhúss 2,10 m. á Melavellinum árið 1965. Innanhúss stökk Jón hæst 2,11 m. árið 1962 og var það annar besti árangurinn í heiminum það ár.
Jón var mjög öflugur í stökkum án atrennu og setti heimsmet unglinga í hástökki án atrennu árið 1961 þegar hann stökk yfir 1,70 m. Síðar jafnaði hann þáverandi Íslandsmet Vilhjálms Einarssonar í hástökki án atrennu, 1,75 m., sem var á þeim tíma besti árangur í heiminum.
Jón var mjög virkur keppandi um árabil í öldungaflokki. Hann var formaður öldungaráðs FRÍ og ötull starfsmaður á frjálsíþróttamótum.
Frjálsíþróttasamband Íslands sendir aðstandendum Jóns samúðarkveðjur.