Fimmtudagskvöldið 14. ágúst nk. er stefnan sett á að skapa skemmtilega stemningu á ÍR-vellinum þegar Kvöldhlaup NIKE – Meistaramót Íslands í 10.000 m hlaupi á braut verður haldið í nýjum og skemmtilegum búningi.
Viðburðurinn er innblásinn af hinum rómaða breska hlaupaviðburði Night of the 10.000 m PB’s, sem haldinn hefur verið árlega á Parliament Hill í London. Þar hefur 10.000 metra hlaup á braut fengið nýtt líf, þar sem áhorfendur standa nærri brautinni, DJ spilar tónlist og partýstemming ríkir allt kvöldið. Með Kvöldhlaupi NIKE viljum við færa þessa hugmynd yfir í íslenskar aðstæður og bjóða upp á skemmtilega upplifun fyrir bæði keppendur og áhorfendur.
Helstu upplýsingar:
- 📍 Staðsetning: ÍR‑völlurinn, Reykjavík
- 📅 Dagsetning: Fimmtudagskvöldið 14. ágúst 2025
- 🕖 Ræsing: Karlar kl. 19:00 • Konur kl. 20:00
- 💸 Þátttökugjald: 2.200 kr. skv. gjaldskrá FRÍ
- 🏃 Greinar: 10.000 m hlaup karla og 10.000 m hlaup kvenna
- 🎯 Lágmörk:
– Karlar: ≤ 42:00 mín
– Konur: ≤ 50:00 mín
(Lágmörkum þarf að hafa verið náð á tímabilinu 1. maí 2024 til 13. ágúst 2025 í FRÍ‑vottuðu 10 km götuhlaupi eða löggildu 10 km hlaupi erlendis.) - 👥 Hámarksfjöldi: 25 keppendur í hvorum flokki
- 🎂 Aldurstakmark: 12 ára og eldri
Þar sem um meistaramót á vegum FRÍ er að ræða gilda reglur um félagsaðild og félagsbúninga.
Gestaþátttaka er heimil en gestir geta ekki unnið til verðlauna eða Íslandsmeistaratitils.
Passa þarf að keppnisskór séu á lista leyfilegra skóa hjá Alþjóða frjálsíþróttasambandinu. Keppendur í verðlaunasætum geti átt von á að skóbúnaður þeirra verði skoðaður.
Skráning fer fram inni á netskraning.is og þar sem aðeins eru 25 pláss í boði í hvorum flokki er um að gera að drífa sig að skrá sig. Þetta er frábært tækifæri fyrir hlaupara að taka þátt í skemmtilegu 10.000 m hlaupi á braut og hvetjum við alla hlaupara sem eru með lágmark að skrá sig, þó svo að þeir séu ekki með mikla keppnisreynslu í brautarhlaupum.