Evrópumeistaramót masters í frjálsíþróttum fer nú fram í Torun í Póllandi og hafa íslenskir keppendur þegar látið að sér kveða með góðum árangri og Íslandsmetum.
Fríða Rún Þórðardóttir náði frábærum árangri í 3000 metra hlaupi í W55 flokki. Hún hafnaði í 3.–4. sæti og setti um leið nýtt Íslandsmet í flokknum, 11:04,47 mín.
Hafsteinn keppti síðan í undanúrslitum í 400 metra hlaupinu á laugardagsmorgni. Þar varð hann fjórði í sínum riðli á tímanum 62,70 sek. og var ekki langt frá því að komast áfram í úrslit, en síðasti tími inn í úrslit var 62,51 sek. Hafsteinn hefur þar með lokið keppni á mótinu.
Helgi Sigurðsson átti einnig sterkt hlaup í 3000 metrum í M65 flokki, þar sem hann varð í 4. sæti og bætti Íslandsmetið í sínum flokki þegar hann kom í mark á 11:02,25 mín.
Skúli Guðbjarnarson tók þátt í riðlakeppni 60 metra hlaups á sunnudag og hljóp á 10,20 sekúndum. Hann varð sjöundi í sínum riðli og hefur þar með lokið keppni á mótinu.
Á sunnudaginn 29. mars keppti Fríða Rún í 5 km götuhlaupi í W55 flokki og hafnaði þar í 8. sæti á tímanum 20:40 mín.
Fríða Rún á þó enn eftir fleiri greinar á mótinu, en hún keppir næst í víðavangshlaupi á miðvikudag og síðan í 1500 metra hlaupi 2. apríl. Þá keppir Hrönn Guðmundsdóttir í undanúrslitum í 800 metra hlaupi á mánudag.
Hægt er að fylgjast með streymi hér
hægt er að fylgjast með úrslitum hér