Ísland verður með þrjá keppendur á Heimsmeistaramótinu innanhúss í frjálsíþróttum, sem fer fram í Kujawy Pomorze í Póllandi dagana 20.-22. mars. Þær Aníta Hinriksdóttir, Christina Alba Marcus Hafliðadóttir og Júlía Kristín Jóhannesdóttir munu keppa fyrir hönd Íslands.
HM innanhúss er stærsta mót vetrarins á alþjóðlegum vettvangi. Keppt verður í 27 greinum á þremur keppnisdögum og búast má við um 500 keppendum frá yfir hundrað þjóðum.
Það er afar ánægjulegt að Ísland eigi þrjá fulltrúa á stærsta móti vetrarins, og sérstaklega ánægjulegt að sjá tvær ungar hlaupakonur stíga sín fyrstu skref á þessu sviði.
Júlía Kristín Jóhannesdóttir
Júlía keppir í 60 m grindarhlaupi kvenna, en hlaupið verður mjög sterkt. Samkvæmt opinberum þátttakendalista eru 47 keppendur frá 34 þjóðum skráðir til leiks í greininni.
Júlía Kristín Jóhannesdóttir átti frábæran febrúarmánuð og endaði hann með stæl þegar hún sigraði 60 m grind á The American Indoor Track & Field Championship í Birmingham í Alabama á 8,18 sekúndum og setti þar með nýtt Íslandsmet. Þar með hafði hún bætt 30 ára gamalt met Guðrúnar Arnardóttur í greininni þrisvar sinnum á skömmum tíma.
Þátttaka Júlíu er sérstaklega athyglisverð, en hún er yngst keppenda í 60 m grindarhlaupi kvenna samkvæmt birtum þátttakendalista en hún er fædd 2005. Hún kemur inn á mótið eftir að hafa bætt Íslandsmetið í greininni og fær nú tækifæri til að keppa við nokkrar af bestu grindarhlaups konum heims á stærsta innanhússsviði ársins.
Undanrásir fara fram sunnudaginn 22. mars kl. 11:55 að íslenskum tíma.
Christina Alba Marcus Hafliðadóttir
Keppnin í 60 m hlaupi kvenna, verður afar sterk, en alls eru 54 keppendur frá 39 þjóðum skráðir til leiks.
Alba hefur einnig átt mjög sterkan vetur. Hún varð Íslandsmeistari í 60 m hlaupi á Meistaramóti Íslands innanhúss þegar hún hljóp á 7,42 sekúndum, sem var jafnframt mótsmet. Hún hefur sett markmið sitt á Íslandsmetið sem er 7,35 sek.
Þátttaka Ölbu er einnig athyglisverð í ljósi þess að hún er fædd 2007 og er því ein af yngstu keppendum í þessari grein, en það er ein sem er yngri. Hún stígur þar inn á svið með reynslumiklum konum úr fremstu röð og verður þetta dýrmæt reynsla og stórt skref á hennar ferli.
Undanrásir fara fram laugardaginn 21. mars kl. 10:05 að íslenskum tíma.
Aníta Hinriksdóttir
íta Hinriksdóttir verður einnig meðal íslenskra keppenda á HM innanhúss. Aníta er ein reynslumesta hlaupakona Íslands á alþjóðlegum vettvangi og hefur í gegnum ferilinn keppt á fjölda stórmóta með eftirtektarverðum árangri.
Á ferilskrá hennar má meðal annars finna bronsverðlaun á EM innanhúss árið 2017 í 800 m, silfur á EM U23 sama ár í 800 m, gull á HM U18 árið 2013.
Nú mætir hún aftur til leiks, að þessu sinni í 1500 m á HM innanhúss.
Undanrásir fara fram föstudaginn 20. mars kl. 17:22 að íslenskum tíma.