Frjálsíþróttahluti Reykjavíkurleikanna fór fram í Laugardalshöllinni fyrr í dag, laugardaginn 24. janúar. Mikil gleði ríkti á vellinum og ekki síður í fullum áhorfendastúkunum, en fjöldi fólks var mættur á svæðið til að hvetja áfram okkar allra besta frjálsíþróttafólk.
Keppnin var hörkuspennandi í mörgum greinum og flottur árangur náðist einnig í mörgum þeirra.
Fyrstir inn á völlinn voru keppendur í 800 m hlaupi karla og þar kom Fjölnir Brynjarsson (FH) fyrstur í mark á 1:55,38 mín. Annar var Leó Örn Þórarinsson (FH) á frábæru persónulegu meti, 1:56,17 mín. og þriðji, einnig á persónulegu meti, var Gestur Daníelsson (FH) en hann kom í mark á 1:57,06 mín.
Fyrstu þrjár í 60 m hlaupi stúlkna U16 komu allar í mark á persónulegu meti, frábær árangur hjá þessum ungu hlaupurum. Eyrún Svala Gustavsdóttir (Breiðablik) kom fyrst í mark í 60 m hlaupi stúlkna U16 en hún hljóp á 8,19 sek, önnur var Emilía Ólöf Jakobsdóttir (ÍR) en hún hljóp á 8,31 sek og þriðja var Magnea Furuhhelm Magnúsdóttir (Dímon) á 8,41 sek.
Sigurður Ari Orrason (ÍR) kom fyrstur í mark í 60 m hlaupi U16 en hann hljóp á 7,42 sek. Annar var Tómas Ingi Kermen (ÍR) en hann kom í mark á 7,71 sek sem er jöfnun á hans besta árangri og þriðji, á persónulegu meti, var Kolbeinn Ernir Sævarsson (FH) en hann hljóp á 7,82 sek.
Hin enska Saskia King kom fyrst í mark í 60 m hlaupi kvenna á 7,50 sek, önnur var Christina Alba Marcus Hafliðadóttir (Fjölnir) á 7,54 sek og þriðja var Eir Chang Hlésdóttir (ÍR) á 7,67 sek.
60 m hlaup karla var svakalega spennandi en þar komu þeir jafnir í mark þeir Dylan Bhatti frá Englandi og Daníel Ingi Egilssson (FH) á tímanum 6,91 sek, sem er jöfnun á besta tíma Dylans en persónulegt met hjá Daníel. Þriðji var Kristófer Þorgrímsson (FH) á 7,03 sek.
Fyrstu þrjár í 800 m hlaupi stúlkna U18 komu allar í mark á persónulegu meti, frábært hlaup hjá þeim. Eyrún Svala Gustavsdóttir (Breiðablik) kom fyrst í mark á 2:25,81 mín, önnur var Bryndís María Jónsdóttir (ÍR) á 2:26,30 mín og þriðja var Sara Mist Orradóttir (Breiðablik) á 2:27,25 mín.
Í 800 m hlaupi pilta U18 kom Patrekur Ómar Haraldsson (FH) fyrstur í mark á 2:00,36 mín. Annar, á persónulegu meti, var Tómas Ingi Kermen (ÍR) en hann kom í mark á 2:12,83 mín og þriðji, einnig á persónulegu meti, var Funi Snær Torfason (Ármann) en hann hljóp á 2:13,64 mín.
Helga Þóra Sigurjónsdóttir (FH) vann hástökk kvenna en hún stökk 1,60 m, önnur var Mabel-Rose Scales frá Englandi sem stökk 1,71 m og þriðja var Helga Fjóla Erlendsdóttir (Garpur) sem stökk 1,65 m sem er jöfnun á hennar besta árangri.
Í langstökki karla stökk Samuel Wright frá Englandi lengst en hans lengsta stökk í dag var 7,07 m. Annar, með stökk upp á 6,59 m, var Tobías Þórarinn Matharel (UFA) og þriðji, einnig með stökk upp á 6,59 m, var Jacques R. S. Borges (Breiðablik).
Birna Kristín Kristjánsdóttir (FH) vann langstökk kvenna með stökki upp á 6,35 m. Önnur var Georgina Scoot frá Englandi en hún stökk 5,96 m og Ísold Sævarsdóttir (FH) var þriðja með stökk upp á 5,89 m.
Eir Chang Hlésdóttir (ÍR) kom fyrst í mark í 200 m hlaupi kvenna en hún hljóp á 24,20 sek. Önnur, á persónulegu meti, var Ísold Sævarsdóttir (FH) en hún kom í mark á 24,79 sek og þriðja var Saskia King frá Englandi á 24,92 sek.
David Chapman frá Englandi kom fyrstur í mark í 200 m hlaupi karla en hann hljóp á 21,73 sek. Annar, á persónulegu meti, var Gabríel Glói Freysson (UFA) en hann kom í mark á 22,46 sek og þriðji, einnig á persónulegu meti, var Pétur Óli Ágústsson (Fjölnir) á 23,02 sek.
Í kúluvarpi pilta U18 kastaði Benedikt Gunnar Jónsson (ÍR) lengst og lengsta kast hans í dag var 18,07 m. Annar var Harry Beard frá Englandi en hann kastaði 16,72 m og þriðji var Garðar Atli Gestsson (UFA) með kast upp á 14,88 m.
Kristján Kári Ólafsson (Selfoss) sigraði kúluvarp karla U20 með kasti upp á 12,56 m.
Erna Sóley Gunnarsdóttir (ÍR) sigraði kúluvarp kvenna með kasti upp 16,94 m og önnur var Sophie McKinna frá Englandi sem kastaði 16,87 m.
Kjartan Óli Bjarnason (Fjölnir) kom fyrstur í mark í 400 m hlaupi karla á 49,51 sek sem er persónuleg bæting og í fyrsta sinn sem hann fer undir 50 sekúndur innanhúss, frábær árangur hjá Kjartani Óla. Annar var Ethan Kirby frá Englandi á 49,94 sek og þriðji var Ívar Kristinn Jasonarson (ÍR) á 50,14 sek.
Endaspretturinn í 1500 m hlaupi kvenna var mjög spennandi en þar áttust við nöfnurnar Íris Anna Skúladóttir (FH) og Íris Dóra Snorradóttir (FH). Íris Anna kom fyrst í mark á 4:42,30 mín og rétt á eftir henni kom Íris Dóra í mark á 4:42,42 mín. Þriðja, á persónulegu meti, var Auður Ómarsdóttir (Ármann) á 5:09,90 mín.
Lokagreinin í dag var 1500 m hlaup karla sem var alveg æsispennandi á lokakaflanum en það fór þannig að Jack Higgins frá Englandi kom fyrstur í mark á 3:40,28 mín, Ted Higgins var annar á 3:40,37 mín og þriðji var Baldvin Þór Magnússon (UFA) á 3:40,51 mín. Þetta var hnífjafnt og spennandi hlaup.
Virkilega skemmtilegt og vel heppnað mót og óskum við öllu þessu frábæra íþróttafólki til hamingju með árangurinn sinn. Eins þökkum við öllum sem komu að framkvæmd mótsins innilega fyrir, svona mót gerist ekki af sjálfu sér og komu mjög margar hendur að þessu og gekk framkvæmdin mjög vel. Eins sendum við innilegar þakkir til styrktaraðila FRÍ sem og til styrktaraðila mótsins.
Heildarúrslit mótsins er hægt að skoða hér.
Myndir frá mótinu er hægt að skoða á Flickr síðu FRÍ.