European Throwing Cup fer fram í Nicosia á Kýpur dagana 14.–15. mars, þar sem margir af fremstu kösturum Evrópu koma saman til keppni. Mótið er fastur liður í alþjóðlega kastmótadagatalinu og markar fyrir marga upphaf utanhússtímabilsins. Fyrir keppendur er þetta því mikilvægt tækifæri til að fá sterka stöðutöku snemma vors og sjá hvar þeir standa gagnvart öflugri alþjóðlegri samkeppni. Keppnin verður haldin á GSP-leikvanginum í Nicosia og verður sýnd í beinni útsendingu á YouTube-rás European Athletics.
Hægt er að sjá tímaseðil mótsins hér
Ísland sendir sterka sveit til leiks, en lágmörk gilda inn á mótið og því ljóst að þar eru á ferðinni keppendur sem hafa unnið sér þátttökurétt með árangri sínum. Val liðsins var unnið af ÍÞA og afreksstjóra.
Mótið er afar sterkt skipað í ár en alls eru 287 keppendur skráðir til leiks. Meðal þeirra eru nokkur af stærstu nöfnum í Evrópu, sem undirstrikar vægi mótsins. Á síðu European Athletics er sérstaklega bent á að kringlukast karla geti orðið afar opið og spennandi. Þar er Guðni Valur Guðnason nefndur meðal þeirra keppenda sem gætu blandað sér í toppbaráttuna. Guðni á 69,35 metra og verður því afar áhugavert að fylgjast með honum á Kýpur um helgina.
Íslenska liðið er skipað þeim Hilmari Erni Jónssyni í sleggjukasti, Guðna Val Guðnasyni í kringlukasti, Guðrúnu Karítas Hallgrímsdóttur í sleggjukasti, Ernu Sóley Gunnarsdóttur í kúluvarpi og Heru Christensen í kringlukasti U23.
Keppendur spenntir fyrir verkefninu
Guðni segir undirbúninginn hafa gengið vel og að mikil vinna hafi farið í tæknina á síðustu vikum. „Markmiðið er að fara vel í gegnum mótið og halda tækninni eins stöðugri og hægt er. Við höfum unnið mikið í tækninni undanfarið og ef hún heldur gæti kringlan farið þokkalega góða vegalengd,“
Guðrún Karítas segist spennt fyrir verkefninu og að markmiðið sé fyrst og fremst að ná góðri framkvæmd. „Mótið leggst vel í mig og ég er spennt að opna tímabilið og sjá hvar staðan er. Markmiðið er fyrst og fremst að vera slök og ná að framkvæma það sem við höfum verið að vinna í.“
Hera Christensen tekur undir það og segir gott að fá tækifæri til að opna tímabilið í sterkri keppni. „Æfingar hafa gengið vel fram að móti og það er fínt að hafa komið aðeins fyrr út til að stilla inn köstin eftir að hafa kastað í búri í allan vetur. Markmiðið um helgina er að hafa gaman, kasta tæknilega vel og það væri auðvitað skemmtilegt að bæta sig.“
Hilmar Örn Jónsson segir einnig spennandi að fá stöðutöku svona snemma á árinu. „Ég er mjög spenntur fyrir því að fá tækifæri til að taka stöðuna svona snemma á tímabilinu. Æfingar hafa gengið vel og ég stefni einfaldlega á að sýna það úti á Kýpur.“
Það verður því nóg um að vera hjá íslenska hópnum á Kýpur um helgina og spennandi að sjá hvernig honum gengur í þessari sterku alþjóðlegu keppni.
Dagskrá
Laugardagur 14. mars
- 10:30 – Guðrún Karítas Hallgrímsdóttir, sleggjukast
- 12:50 – Erna Sóley Gunnarsdóttir, kúluvarp
- 14:15 – Hera Christensen, kringlukast U23
- 14:35 – Guðni Valur Guðnason, kringlukast
Sunnudagur 15. mars
- 10:25 – Hilmar Örn Jónsson, sleggjukast
Tímarnir hér að ofan eru birtir á íslenskum tíma.