Stjórn Frjálsíþróttasambands Íslands (FRÍ) samþykkti á stjórnarfundi þann 26. nóvember sl. að ganga til samninga við Tilastopaja OY Track and Field Statistics um þjónustusamning sem tryggir aðgengi að og þróun skráningaforrits Tilastopaja fyrir afrek í frjálsíþróttum á Íslandi.
Ákvörðunin er tekin í framhaldi af góðu samstarfi sem hefur verið í gangi við mótaforritið Roster, en FRÍ hefur verið í samstarfi við það frá árinu 2024. Roster felur í sér beina tengingu við afrekaskrá Tilastopaja, sem styrkir skráningu afreka og stuðlar að öruggari og samræmdari gagnavinnslu.
Innleiðing Roster hefur gengið vel og er Roster nú mótaforrit FRÍ, sbr. 3. gr. reglugerðar um umsóknir vegna mótahalds.
Hægt er að sjá afrekaskrá FRÍ hér
Hægt er að sjá Roster mótaforrit hér
Vefnámskeið fyrir mótshaldara 10. febrúar
Mótshöldurum og öðrum áhugasömum er boðið að sitja vefnámskeið um vinnulag við Roster þriðjudaginn 10. febrúar nk.
Óskað er eftir því að skráningar berist á iris@fri.is í síðasta lagi mánudaginn 9. febrúar.
Aukin krafa um formskráningu afreka
Um nokkurt skeið hefur verið ljóst að leysa þyrfti mótaforritið Þór af hólmi og skerpa á skráningu afreka í afrekaskrá. Formkröfur til skráninga í afrekaskrár hafa aukist mikið af hálfu alþjóða frjálsíþróttasambandsins (World Athletics) á síðustu misserum og mun innleiðing Roster og gagnagrunns Tilastopaja styðja við örugga skráningu afreka, þ.a. þau fáist viðurkennd af World Athletics.
Markmiðið er einnig að bæta afrekaskrá Íslands í frjálsíþróttum og gera iðkendum auðveldara að afla upplýsinga um eigin afrek, Íslandsmet í aldursflokkum og nálgast aðra tölfræði um afrek í frjálsum íþróttum
Ábyrgð mótshaldara
Vert er að benda á að mótshaldarar bera ábyrgð á fullnægjandi skráningu afreka. Séu þau ekki skráð með fullnægjandi hætti, fást þau ekki viðurkennd og eru þá ekki tæk í afrekaskrá. Notkun á Roster er mikilvæg forsenda þess og ráðleggur stjórn FRÍ mótshöldurum eindregið að tileinka sér notkun á mótaforritinu, þ.a. forðast megi að afrek fáist ekki skráð.
Nánari upplýsingar
Samskipti við Tilastopaja og Roster eru á hendi skrifstofu FRÍ og formanns skráningarnefndar.
Nánari upplýsingar veitir framkvæmdastjóri FRÍ, Guðmundur Karlsson, og formaður skráningarnefndar, Unnur Björnsdóttir.