Um helgina, 16.–17. ágúst, fer hin árlega Meistaramótsþrenna fram á ÍR-vellinum í Reykjavík. Þar verður keppt á þremur mótum: Meistaramóti Íslands í fjölþrautum, Meistaramóti Íslands í 10.000 m hlaupi og Meistaramóti Íslands í eldri aldursflokkum.
Í sjöþrautinni verður Ísold Sævarsdóttir á meðal þátttakenda, en hún er nýkomin heim af Evrópumeistaramóti U20 þar sem hún keppti einmitt í sjöþraut. Ísold er margfaldur Íslandsmeistari í fjölþrautum í yngri aldursflokkum og keppir nú í flokki 18–19 ára.
Í 10.000 m hlaupi karla eru skráðir nokkrir af fremstu langhlaupurum landsins, þar á meðal Hlynur Andrésson, Íslandsmethafi í greininni en hann á einnig Íslandsmetin í maraþoni og hálfu maraþoni. Með honum á brautinni verður meðal annarra Arnar Pétursson, nýkrýndur Íslandsmeistari og Íslandsmethafi í 100 km hlaupi. Það stefnir í afar spennandi keppni í 10.000 m hlaupinu – ekki síst þar sem átta karlmenn eru skráðir til leiks, sem er fjórföld aukning frá síðasta ári.
Á Meistaramóti Íslands í eldri aldursflokkum má finna margar kempur frjálsíþróttanna, þar á meðal Fríðu Rún Þórðardóttur og Hafstein Óskarsson, sem voru valin masters-frjálsíþróttafólk ársins 2024. Að loknu mótinu munu margir þátttakendur hefja lokaundirbúning fyrir Evrópumeistaramót eldri aldursflokka utanhúss, sem fer fram á Madeira í Portúgal dagana 9.–28. október.
Skráning í MÍ í 10.000 m hlaupi er enn þá opin og fer hún fram hér.
Sama á við um skráningu á MÍ í eldri aldursflokkum og fer sú skráning fram hér.
Tímaseðil MÍ í fjölþraut má skoða hér.
Hér má sjá tímaseðil MÍ í eldri aldursflokkum.
Hér er tímaseðillinn fyrir MÍ í 10.000 m hlaupi.